பிகாரில் புதிய ஆட்சி: பாஜக கூட்டணி தீவிர ஆலோசனை

பிகாரில் புதிய ஆட்சி அமைப்பது தொடர்பாக, தேசிய ஜனநாயக கூட்டணிக் கட்சிகளான பாஜகவும், ஐக்கிய ஜனதா தளமும் தீவிர ஆலோசனையில் ஈடுபட்டுள்ளன.

- 

பிகார் சட்டப்பேரவைத் தேர்தலில் மொத்தமுள்ள 243 தொகுதிகளில் 202 இடங்களைக் கைப்பற்றிய தேசிய ஜனநாயக கூட்டணி, அசைக்க முடியாத பலத்துடன் ஆட்சியைத் தக்கவைத்துள்ளது. கடந்த 2020 தேர்தலில் சொற்ப பெரும்பான்மையுடன் (125) ஆட்சி அமைத்த இந்தக் கூட்டணிக்கு இந்த முறை இமாலய வெற்றி கிடைத்துள்ளது.

தேர்தலுக்கு முன்பு தேசிய ஜனநாயக கூட்டணியின் முதல்வர் வேட்பாளராக நிதீஷ் குமார் அதிகாரபூர்வமாக அறிவிக்கப்படவில்லை. அவரது தலைமையில் தேசிய ஜனநாயக கூட்டணி போட்டியிடுவதாகவே பாஜக கூறியிருந்தது.

பிகாரில் தேசிய ஜனநாயக கூட்டணி மீண்டும் வெற்றி பெற்றால், நிதீஷ் குமாரை முதல்வராக்க மாட்டார்கள் என்று பிரசாரத்தின் போது ஆர்ஜேடி தொடர்ந்து கூறி வந்தது.