பல்லி: அச்சம் தவிர்!

உயிரினங்களில் பல்லிகள் என்றாலே பலருக்கும் அருவருப்பாக இருக்கும். ஆனால் பல்லிகள் மனித குலத்துக்கு நன்மையைச் செய்கின்றன. பூச்சிகளின் எண்ணிக்கையைக் கட்டுக்குள் வைக்கின்றன. கொசுக்கள், கரையான்கள், ஈக்கள், பூச்சிகளை உணவாக ஏற்று, பல்லிகள் உயிர்வாழ்கின்றன' என்கிறார் 'அழிந்து வரும் பல்லியினங்கள்' குறித்து முப்பது ஆண்டுகளாக ஆராய்ந்துவரும் வன உயிரின ஆராய்ச்சியாளர் கொ. அசோக சக்கரவர்த்தி.

- -ஆர்.வேல்முருகன்

மதுரை பாரதி யுவகேந்திராவின் சுவாமி விவேகானந்தர் விருது, ஜப்பான் ஹியோஷி நிறுவனத்தின் ஹியோஷி இளம் சுற்றுச் சூழல் ஆய்வாளர் விருது, திருச்சி தூய வளனார் கல்லூரியின் சிறந்த சுற்றுச் சூழல் அறிவியல் புத்தக எழுத்தாளர் விருது, புதுதில்லி ஜவாஹர்லால் நேரு பல்கலைக்கழக பேராசிரியர் ஸ்ரீவஸ்தவா அறிவியல்-சமூக நிறுவனத்தின் சிறந்த அறிவியல் விருது உள்ளிட்ட பல விருதுகளை இந்த ஆராய்ச்சிக்காகப் பெற்றுள்ளார்.

அவரிடம் பேசியபோது: "பூமியின் சூழல் மண்டலத்தில் மிக முக்கியமானவை உயிரினங்கள். சூழல் மண்டலங்கள் இயங்குவதில் உயிரினங்களின் பங்கு அதிகம். இயற்கையின் இயக்கம் என்பது மனிதனைத் தவிர பிற உயிரினங்களைக் கொண்டதுதான்.

யானைகள், புலிகள், சிங்கங்கள், சிறுத்தைகள், மயில்கள், வண்ணத்துப்பூச்சிகள், அந்துப்பூச்சிகள், பல்லிகள், பாம்புகள் உள்ளிட்ட உயிரினங்களை பெரிய, சிறிய உயிரினங்கள் என இரு வகைப்படுத்தலாம். சிறிய உயிரினங்களில் பல்லிகள், வண்ணத்துப்பூச்சிகள் அடங்கும்.