உயர்நிலையில் ஊழலை வேரறுக்கவே பதவிப் பறிப்பு மசோதா

தீவிர குற்றப் புகாரில் கைதாகும் பிரதமர், முதல்வர் கள், அமைச்சர்களைப் பதவி நீக்குவதற்கான அரசமைப்புச் சட்டத் திருத்த மசோதா, ஆட்சி அதிகாரத்தின் உயர்நிலையில் ஊழலை வேரறுப்பதை நோக்கமாகக் கொண்டது என்று பிரதமர் நரேந்திர மோடி வெள்ளிக்கிழமை தெரிவித்தார்.

- 

எதிர்க்கட்சித் தலைவர்களில் பெரும்பாலானோர் ஊழலில் ஈடுபட்டு சிறையிலோ அல்லது ஜாமீன் பெற்று வெளியிலோ இருக்கின்றனர்; தங்கள் அரசியல் கனவுகள் சிதைந்துவிடும் என்பதால், இந்த மசோதாவை எதிர்க்கட்சிகள் எதிர்க்கின்றன என்றும் அவர் சாடினார்.

தீவிர குற்றப் புகாரில் கைதாகி, 30 நாள்கள் காவலில் வைக்கப்படும் பிரதமர், முதல்வர்கள், அமைச்சர்களைப் பதவி நீக்கம் செய்வதற்கான அரசமைப்புச் சட்டத்தின் 130-ஆவது திருத்த மசோதா, மக்களவையில் கடந்த புதன்கிழமை எதிர்க்கட்சிகளின் கடும் எதிர்ப்புக்கு இடையே தாக்கல் செய்யப்பட்டது. பின்னர், நாடாளுமன்றக் கூட்டுக் குழுவின் ஆய்வுக்காக மசோதா அனுப்பப்பட்டது. இந்நிலையில், பிகார் மாநிலம், கயாஜியில் ரூ.13,000 கோடிக்கும் மேற்பட்ட மதிப்பிலான பல்வேறு வளர்ச்சித் திட்டங்களை வெள்ளிக்கிழமை தொடங்கிவைத்த பிரதமர் மோடி, புதிய திட்டங்களுக்கு அடிக்கல் நாட்டினார். பின்னர், பொதுக்கூட்டத்தில் அவர் பேசியதாவது: