ராஜீவ் காந்தியின் 81-ஆவது பிறந்தநாள்: பிரதமர், காங்கிரஸ் தலைவர்கள் மரியாதை

முன்னாள் பிரதமர் ராஜீவ் காந்தியின் 81-ஆவது பிறந்தநாளையொட்டி, அவருக்கு பிரதமர் நரேந்திர மோடி, காங்கிரஸ் தலைவர்கள் உள்ளிட்டோர் புதன்கிழமை மரியாதை செலுத்தினர்.

- 

புது தில்லி, ஆக. 20:

இந்தியாவின் இளம் பிரதமர் என்ற சிறப்புக்குரிய ராஜீவ் காந்தி, கடந்த 1984 முதல் 1989 வரை அப்பதவியை வகித்தார். கடந்த 1991-ஆம் ஆண்டில் ஸ்ரீபெரும்புதூரில் விடுதலைப் புலிகள் அமைப்பின் தற்கொலைப் படை தாக்குதலில் அவர் கொல்லப்பட்டார். ராஜீவ் காந்தியின் பிறந்தநாளான ஆகஸ்ட் 20-ஆம் தேதி நல்லிணக்க தினமாக கடைப்பிடிக்கப்படுகிறது.

இந்நிலையில், 'முன்னாள் பிரதமர் ராஜீவ் காந்தி பிறந்த தினத்தில், அவருக்கு மரியாதை செலுத்துகிறேன்' என்று பிரதமர் மோடி தனது 'எக்ஸ்' சமூக வலைதள பக்கத்தில் பதிவிட்டார்.

நாடாளுமன்றம், நினைவிடத்தில் மரியாதை: தில்லியில் உள்ள ராஜீவ் காந்தியின் நினைவிடமான வீரபூமியில், காங்கிரஸ் தேசிய தலைவர் மல்லிகார்ஜுன கார்கே, கட்சியின் பொதுச் செயலர்கள் கே.சி.வேணுகோபால், பிரியங்கா காந்தி உள்ளிட்டோர் மரியாதை செலுத்தினர்.