பிஏபி பிதாமகன்களுக்கு முழு உருவச் சிலை

முதல்வர் மு.க.ஸ்டாலின் திறந்துவைத்தார்

- 

பரம்பிக்குளம் - ஆழியாறு நீர்ப் பாசனத் திட்டம் அமைத்து 3.77 லட்சம் ஏக்கர் நிலங்கள் பாசன வசதி பெறுவதற்கு காரணமாக இருந்த 4 தலைவர்களின் உருவச் சிலைகளை முதல்வர் மு.க.ஸ்டாலின் பொள்ளாச்சியில் திங்கள்கிழமை திறந்து வைத்தார்.

தமிழ்நாடு, கேரள எல்லையில் உள்ள மேற்குத் தொடர்ச்சி மலையில் உருவாகி மேற்கு நோக்கிப் பாய்ந்து கடலில் கலக்கும் நீரைத் திருப்பி, இருமாநிலங்களிலும் வேளாண்மைக்கு பயன்படுத்தும் நோக்கில் பரம்பிக்குளம் - ஆழியாறு திட்டம் செயல்படுத்தப்பட்டுள்ளது. இரு மாநில அரசுகளின் ஒத்துழைப்புடன் இந்தத் திட்டம் 1962-இல் செயல்பாட்டுக்கு வந்தது.

பிஏபி பாசனத்திட்டத்தை செயல்படுத்த உழைத்த, முன்னாள் முதல்வர் கே.காமராஜர், முன்னாள் மத்திய அமைச்சர் சி.சுப்பிரமணியம், முன்னாள் மேலவை உறுப்பினர் வி.கே.பழனிசாமி, பொள்ளாச்சி முன்னாள் எம்எல்ஏ நா.மகாலிங்கம் ஆகியோருக்கு உருவச் சிலை அமைக்கப்படும் என்றும் பொள்ளாச்சியில் உள்ள நீர்வளத் துறை தலைமைப் பொறியாளர் அலுவலகத்துக்கு சி.சுப்பிரமணியம் பெயர் சூட்டப்படும் என்றும் தமிழக அரசு அறிவித்திருந்தது.

அதன்படி, தலைவர்களின் சிலை திறப்பு விழா பொள்ளாச்சியில் திங்கள்கிழமை நடைபெற்றது. இதில், முதல்வர் மு.க.ஸ்டாலின் கலந்து கொண்டு தலைமைப் பொறியாளரின் அலுவலகமான சி.சுப்பிரமணியம் வளாகத்தில் நிறுவப்பட்டுள்ள கே.காமராஜர், சி.சுப்பிரமணியம், வி.கே.பழனிசாமி, பொள்ளாச்சி நா.மகாலிங்கம் ஆகியோரின் உருவச் சிலைகளைத் திறந்துவைத்தார்.