விவசாயிகளுக்கு 24 மணிநேரமும் மும்முனை மின்சாரம் எடப்பாடி கே.பழனிசாமி வாக்குறுதி

தமிழகத்தில் அதிமுக ஆட்சி அமைத்ததும், விவசாயத்துக்கு 24 மணிநேரமும் மும்முனை மின்சாரம் வழங்கப்படும் என அதிமுக பொதுச் செயலாளர் எடப்பாடி கே.பழனிசாமி தெரிவித்தார்.

- 

‘மக்களைக் காப்போம், தமிழகத்தை மீட்போம்’ என்ற தலைப்பில் சட்டப்பேரவைத் தொகுதிவாரியாக சுற்றுப்பயணம் மேற்கொண்டுவரும் அவர், 3-ஆம் கட்ட சுற்றுப்பயணத்தை கிருஷ்ணகிரி மாவட்டம், வேப்பனப்பள்ளி சட்டப்பேரவைத் தொகுதிக்குள் பட்ட ராயக்கோட்டையில் திங்கள்கிழமை தொடங்கினார். அப்போது அவர் பேசியதாவது:

கிருஷ்ணகிரி மாவட்டம், வேப்பனப்பள்ளி சட்டப்பேரவைத் தொகுதி விவசாயம் நிறைந்த பகுதியாகும். விவசாயிகளின் நலனுக்காக எனது தலைமையிலான கடந்த அதிமுக ஆட்சியில் எண்ணற்ற திட்டங்கள் நிறைவேற்றப்பட்டன. விவசாயிகள் பாதிக்கப்படும்போதெல்லாம், அவர்களுக்கு ஆதரவாக குரல்கொடுக்கும் அரசாக அதிமுக இருந்தது.