ஈரானுக்கு உதவத் தயார்: ரஷியா

புதினுடன் அப்பாஸ் அராக்சி சந்திப்பு

- 

இஸ்ரேலுடன் ஆன மோதலில் ஈரானுக்கு உதவத் தயாராக இருப்பதாக ரஷியா தெரிவித்தது.

ரஷியாவில் அந்நாட்டு அதிபர் விளாதிமீர் புதினை, ஈரான் வெளியுறவு அமைச்சர் அப்பாஸ் அராக்சி திங்கள்கிழமை சந்தித்துப் பேசிய நிலையில், ஈரான் மக்களுக்கு உதவ முயற்சிகள் மேற்கொள்ளப்பட்டு வருவதாக ரஷியா கூறியது.

ஈரானின் அணுசக்தி மற்றும் ஏவுகணைத் திட்டங்களால் தமக்கு அச்சுறுத்தல் இருப்பதாகக் கருதி, அந்நாடு மீது இஸ்ரேல் தாக்குதல் நடத்தியதைத் தொடர்ந்து, இரு நாடுகளுக்கு இடையிலான மோதல் தீவிரமடைந்துள்ளது.

இந்த மோதலில் இஸ்ரேலுக்கு அமெரிக்க அதிபர் டிரம்ப் ஆதரவு அளித்துவரும் நிலையில், ஈரானின் போர்டோ, நடான்ஸ் மற்றும் இஸ்ஃபஹான் பகுதிகளில் உள்ள மூன்று அணுசக்தி மையங்கள் மீது அமெரிக்க போர் விமானங்கள் ஞாயிற்றுக்கிழமை அதிகாலை குண்டுகள் மற்றும் ஏவுகணைகள் மூலம் தாக்குதல் நடத்தின.

ஈரானின் அணுசக்தி செறிவூட்டல் திறனை அழிக்க வேண்டும், அந்நாட்டு அணுஆயுத மிரட்டலுக்கு முடிவு கட்டவேண்டும் என்ற நோக்கத்தில், அங்கு அமெரிக்கா தாக்குதல் நடத்தியதாக டிரம்ப் தெரிவித்தார். ஈரான் அமைதி வழிக்குத் திரும்பி பாவிட்டால் மேலும் பெரிய தாக்குதல் நடத்தப்படும் என்றும் அவர் எச்சரித்தார்.

ஈரான்-ரஷியா இடையே நட்புறவு உள்ள நிலையில், அமெரிக்காவின் தாக்குதலுக்கு ரஷியா வன்மையாக கண்டனம் தெரிவித்தது.

அமெரிக்க தாக்குதலைத் தொடர்ந்து ஈரான் வெளியுறவு அமைச்சர் அப்பாஸ் அராக்சி ரஷியா சென்றார். அந்நாட்டுத் தலைநகர் மாஸ்கோவில் ரஷிய அதிபர் புதினை அராக்சி திங்கள்கிழமை சந்தித்துப் பேசினார். அப்போது புதின் கூறுகையில், ஈரானுடன் ரஷியாவுக்கு நீண்ட காலமாக நம்பகமான உறவு உள்ளது. எந்தக் காரணமும் இல்லாமல் ஈரானுக்கு எதிராக வலிந்து தாக்குதல் நடத்தப்படுகிறது. ஈரான் மக்களுக்கு உதவ ரஷியா சார்பில் முயற்சிகள் மேற்கொள்ளப்பட்டு வருகின்றன' என்றார்.