பாம்பன் புதிய ரயில் பாலம்: பிரதமர் மோடி திறந்துவைத்தார்

ராமநாதபுரம் மாவட்டத்தில் கடலின் குறுக்கே கட்டப்பட்ட பாம்பன் புதிய ரயில் பாலத்தை பிரதமர் நரேந்திர மோடி ஞாயிற்றுக்கிழமை திறந்து வைத்து, நாட்டுக்கு அர்ப்பணித்தார்.

- 

ராமேசுவரம், ஏப். 6:

ராமநாதபுரம் மாவட்டம், ராமேசுவரம் தீவுப் பகுதியை இணைக்கும் வகையில் ஆங்கிலேயர் ஆட்சியின்போது, கடந்த 1914-ஆம் ஆண்டு கடலின் குறுக்கே பாம்பன் ரயில் பாலம் கட்டப்பட்டது. பல்வேறு இயற்கை சீற்றங்களை எதிர்கொண்டதன் காரணமாக, இந்தப் பாலம் கடந்த 2022-ஆம் ஆண்டு பலவீனமடைந்தது. இதையடுத்து, 2022 டிசம்பரில் இந்தப் பாலம் வழியேயான ரயில் சேவை நிறுத்தப்பட்டது.

பிறகு, ரூ. 550 கோடியில் புதிய உயர் தொழில்நுட்பத்தில் பாம்பன் புதிய ரயில் பாலம் கட்டப்பட்டது.

இந்தப் புதிய பாம்பன் ரயில் பாலத்தின் திறப்பு விழா ஞாயிற்றுக்கிழமை நடைபெற்றது. பாம்பன் சாலைப் பாலத்திலிருந்து பிரதமர் நரேந்திர மோடி, புதிய பாம்பன் ரயில் பாலத்தை திறந்து வைத்து, நாட்டுக்கு அர்ப்பணித்தார். பிறகு, இந்தப் பாலத்தின் வழியேயான ரயில் சேவையையும் அவர் தொடங்கிவைத்தார்.