கால்வாய்களின் குறுக்கே சிறுபாலங்கள் சீரமைப்பு

விருகம்பாக்கம், பக்கிங்ஹாம், ஓட்டேரி கால்வாய்களின் குறுக்கே உள்ள சிறுபாலங்களை இடித்து அகற்றிவிட்டு உயர்த்தி கட்ட சென்னை மாநகராட்சி மாமன்றக் கூட்டத்தில் தீர்மானம் நிறைவேற்றப்பட்டது.

- 

பெருநகர சென்னை மாநகராட்சியின் மாதாந்திர மாமன்றக் கூட்டம் மேயர் ஆர்.பிரியா தலைமையில் ரிப்பன் மாளிகை வளாகத்தில் திங்கள்கிழமை நடைபெற்றது.

இதில், துணை மேயர் மு.மகேஷ் குமார், ஆணையர் ஜெ.குமரகுருபரன் ஆகியோர் முன்னிலை வகித்தனர். தொடர்ந்து மாமன்ற உறுப்பினர்கள் எழுப்பிய கோரிக்கைகளுக்கு மேயர் மற்றும் ஆணையர் விளக்கம் அளித்தனர்.

பின்னர், மழை காலங்களில் வெள்ளம் ஏற்படுவதைத் தவிர்க்க கால்வாய்களின் குறுக்கே உள்ள சிறு பாலங்கள் அகற்றப்படவுள்ளதாக தீர்மானம் நிறைவேற்றப்பட்டது. ஓட்டேரி கால்வாய், விருகம்பாக்கம் கால்வாய், பக்கிங்ஹாம் கால்வாய்களின் குறுக்கே உள்ள சிறு பாலங்களை அகற்றி உயர்த்தி கட்ட மாநகராட்சி திட்டமிட்டுள்ளது.

இதில், நியூ பேரன்ஸ் சாலை பாலத்துக்கு ரூ. 9 கோடி, திருக்குமரப்புரம் பாலம், காமராஜர் நகர் 3-ஆவது தெருவில் உள்ள பாலம் மற்றும் கோ.சி.மணி சாலை பாலத்துக்கு தலா ரூ. 5 கோடி, இசிஆர்-ஓஎம்ஆர் சாலையை இணைக்கும் 3 பழைய பாலங்களுக்கு ரூ. 7 கோடி ஒதுக்கப்பட்டுள்ளது.