Buddsoddi yn y Gymraeg

DWI'N siŵr ei bod hi'n berffaith amlwg i bawb mai fy ngholofn i helpodd griw Y Ring, Llanfrothen i gasglu digon o bres i brynu'r brydles mewn pryd. Felly diolch am hynna, a llongyfarchiadau a phob lwc i'r dafarn hyfryd a dwi'n edrych ymlaen yn arw at gael camu drwy'r drws eto.

- 

Os nad y golofn helpodd, peidiwch â deud, gadewch i mi ymdrybaeddu yn fy niffyg gwybodaeth.

Ond jest rhag ofn... mae 'na fenter arall yng Ngogledd Cymru sydd angen ein cefnogaeth: Siop lyfrau Bys a Bawd, Llanrwst. Mae'n debyg mai hon oedd y siop lyfrau Gymraeg gyntaf yng Nghymru, ac mae'n dathlu ei phen-blwydd yn 70 eleni. Mi fysa'n drasiedi tasai Llanrwst yn colli siop hyfryd fel Bys a Bawd.

Agorwyd y siop wreiddiol nôl yn 1955 gan Dafydd ac Arianwen Parri - ia, yr awdur Dafydd Parri (Cyfres y Llewod ac ati), a rhieni Gwawr, Myrddin, Bedwyr, Deiniol a Iolo. Yn y 1980au, symudodd Arianwen Parry ei siop lyfrau Cymraeg o hen siop cigydd i'w safle presennol yn rhif 29 Stryd Ddinbych, a chyfuno å busnes offer swyddfa Gwawr, ei merch. Yn 2007, daeth yr awdur Dwynwen Berry yn berchennog ar y siop, wedyn ddwy flynedd yn ddiweddarach, ehangodd Dwynwen yr adeilad i gynnwys y siop drws nesaf - a oedd yn arfer bod yn eiddo i'w thad, William Berry, a siop fferins neu dda da oedd honno.

Ond mae Dwynwen yn ymddeol rŵan ac wedi methu cael prynwr, felly mae'r gymuned mewn peryg o golli'r siop lyfrau Gymraeg olaf yn Sir Conwy! Ond chwarae teg i'r bobl leol, mae 'na griw wedi dod at ei gilydd i ffurfio pwyllgor Bys a Bawd Pawb, sy'n benderfynol o gadw'r siop ar agor.