“కృష్ణ” మూర్తి తత్వం..!

“కృష్ణ” మూర్తి తత్వం..!

- సింగంపల్లి శేష సాయి కుమార్ 8639635907

బస్టాండ్ లో ప్లాట్ ఫామ్ ఆరు దగ్గర ఉన్న ఇనుప బెంచీలు ఖాళీగా ఉ ంటే అందులో వెళ్ళి కూర్చున్నాడు.

చాలా రోజుల తర్వాత నాన్న వస్తున్నాడు. బస్ ఎక్కడ వస్తోందో తెలియడం లేదు, ఆమూలన టర్నింగ్ తిరిగినవన్నీ, హారన్ కొట్టిన వన్నీ మా ఊరిదే అనుకుంటున్నా, నాన్న నాకోసం వచ్చి చూసి మళ్ళీ ఊరెళ్ళి తన పని తాను చేసుకుంటూ ఉంటాడు. ఒక్కడివే అక్కడ ఎందుకు నా దగ్గర ఉండొచ్చు కదా అంటే, "కాళ్ళు చేతులు అడినంత కాలం ఉంటాలే రా " అంటాడు నవ్వుతూ..

చిన్నప్పటి నుండి నాన్న కష్ట పడుతూనే బ్రతికాడు.

ఆయన చిన్నప్పుడే నాన్న చనిపోయాడు. అమ్మ నలుగులు బిడ్డల్ని ఎలా పెంచింది. అందరూ ఎవరికి తగ్గట్టు వాళ్ళు మంచి నడవడికతో పెరిగారు. అందరూ చదువుకొని ఉద్యోగాల వైపు వెళ్తే, నాన్న మాత్రం వ్యవసాయం చేయడానికే సిద్ధమయ్యాడు. కాయ కష్టం ఆయనకు ఎంతో నచ్చింది. పని చేయకపోతే ఆయనకు అసలు నచ్చదు. ఎన్నో సార్లు కరువు వచ్చింది, ఒక సారి అతివృష్టి, మరో సారి అనావృష్టి అయినా ఆయన నష్టాలను ఓర్చుకున్నాడే కానీ ఏనాడు వదలుకుని సుఖంగా ఉ ందామనుకోలేదు.

****

పెళ్ళై సరిగ్గా పక్షం రోజులు అయ్యిందట, ఊర్లో ఎదుగుతుంటే ఓర్వలేని వాళ్ళు మరీ చెప్పాలంటే దాయాదులు ఎందుకో ఆయన్ను కక్ష కట్టారు.

చెరువులోనుండి పొలానికి వచ్చే కాలువను రాత్రికి రాత్రే తడి కట్టనీకుండా పాడు చేసేవారు, కరెంటు వైర్లు కన్ను పడకుండా కత్తిరించే వాళ్ళు, పంటలకు భీమా అందనిచ్చే వాళ్ళు కాదు, పంట పండనిచ్చే వాళ్ళు కాదు ఒకవేళ పండినా దాన్ని అమ్మనిచ్చే వాళ్ళు కాదు.