ശ്വാനസംഹാര സമരാഞ്ജലി

നായ നക്കാത്ത ഒരൊറ്റ മനുഷ്യജീവിപോലും ആ നാട്ടിൽ ഉണ്ടായിരുന്നില്ല

- ഡോ: ജോർജ് മരങ്ങോലി

ശനി പിടിച്ചപ്പോൾ പടലയോടെ' എന്ന് പറഞ്ഞതു പോലെയായി കാര്യങ്ങൾ തെരുവു നായ്ക്കളുടെ ശല്യം കൊണ്ട് പൊറുതിമുട്ടിയ നാട്ടുകാരെല്ലാം ഒരു പരിഹാരം കാണാൻ വേണ്ടി ഉൾക്കിടിലത്തോടെ, ഉറക്കമിളച്ചിരുന്ന് ചിന്തിച്ചു! നായനക്കാത്ത ഒരൊറ്റ മനുഷ്യജീവിപോലും ആ നാട്ടിൽ ഉണ്ടായിരുന്നില്ല!

കടിക്കുന്ന കാര്യത്തിൽ യാതൊരു പക്ഷാഭേദവും നായകൾ കാണിച്ചില്ല! വൈദ്യനും, വൈദികനും, പാവപ്പെട്ടവനും, പണക്കാരനും, തൊഴിലാളിയും, മുതലാളിയും, സ്ത്രീയും, പുരുഷനും, കുട്ടികളും, പ്രായമായവരും, ഒരുപോലെ കടിമേടിച്ചു. പല കുഞ്ഞുങ്ങളുടെയും കൈകാലുകൾക്ക് കടിയേറ്റപ്പോൾ, ചിലരുടെയെല്ലാം വയറ്റത്തും, മുഖത്തും, നെഞ്ചത്തും, സ്ത്രീകളുടെ മാറിടത്തിലും, എന്തിനേറെപ്പറയുന്നു, ബീരാനിക്കാടെ പറയാൻ പാടില്ലാത്ത ഭാഗത്തുമെല്ലാം നായകൾ കയറി നിരങ്ങി പഞ്ചായത്തിലും, മുനിസിപ്പാലിറ്റിയിലും, മന്ത്രിക്കുമൊക്കെ ജനം പരാതികൊടുത്തു! മൃഗസംരക്ഷണവകുപ്പുണ്ട്, പക്ഷേ ജനസംരക്ഷണ വകുപ്പില്ലാത്തതുകൊണ്ട് ഒരുത്തനും തിരിഞ്ഞു നോക്കിയില്ല.

വേവലാതി പൂണ്ട് ജനങ്ങൾ വീട്ടിലിരുന്നു. സ്കൂളിൽ കുട്ടികളില്ല, സാറന്മാരുമില്ല! കടകമ്പോളങ്ങൾ ഉത്സവം കഴിഞ്ഞ അമ്പലപ്പറമ്പുപോലെ ശൂന്യമായിക്കിടന്നു. ഒടുവിൽ നമ്മുടെ ലോക്കൽ നേതാവിന്റെ തലമണ്ടയിൽ ഒരു രാഷ്ട്രീയ ബുദ്ധി കിളിച്ചു "പുരയ്ക്ക് തീ പിടിക്കുമ്പോഴല്ലേ വാഴ വെട്ടാനൊക്കൂ!' നായകളുടെ ആക്രമണത്തിനെതിരായി ഒരു സമിതി രൂപീകരിച്ച് ഒരു "ശ്വാനസംഹാരസമരം സംഘടിപ്പിക്കുക! പട്ടി കടി കൊണ്ട് കുറെ പൊതുജനങ്ങൾ അതിനോടു യോജിച്ചു.