ખાખી વરદી, લીલુંછમ કાર્ય...

ઈંગ્લિશ લિટરેચરની આ પોસ્ટ-ગ્રેજ્યુએટ યુવતીએ નાના અને પિતા તથા કાકાની જેમ પસંદ કરી પોલીસ અધિકારી તરીકેની કારકિર્દી. એ નોકરી સાથે નાનપણથી હૃદયમાં પાંગરી રહેલા પ્રકૃતિ તરફના પ્રેમનો સરવાળો કરી એણે પોતાના તાબા હેઠળના એસઆરપી કૅમ્પોમાં મિયાવાકી જંગલ થકી સર્જેલી હરિયાળી આજે અનેક લોકો માટે પ્રેરણારૂપ છે.

- સમીર પાલેજા

એમના નાનાજી મધ્ય પ્રદેશ પોલીસ ફોર્સમાં હતા તો પિતા અને કાકા  ગુજરાત પોલીસમાં. ટૂંકમાં, બન્ને તરફથી પોલીસ યુનિફૉર્મ વારસામાં મળ્યો. પ્રકૃતિ તરફનો પ્રેમ પણ આમ લોહીમાં જ વણાઈ ગયો હશે એટલે સુધા પાન્ડેયને નાનપણથી ઝાડ-પાન, પશુ-પંખી તરફ વિશેષ અનુરાગ. આજે એ પ્રેમે સુધાજીને પોલીસ ફોર્સમાં અલગ ઓળખ અપાવી છે.

આ સુધા પાન્ડેય્ એટલે અત્યારે રાજકોટમાં સ્ટેટ રિઝર્વ પોલીસ (એસઆરપી) જૂથ-૧૩નાં કમાન્ડન્ટ તરીકે ફરજ બજાવી રહેલાં પોલીસ અધિકારી.

મૂળ ઉત્તર પ્રદેશના પ્રતાપગઢ જિલ્લાના બદ્રીપ્રસાદ પાન્ડેય્ લગભગ ૯૦ વર્ષ પહેલાં ગુજરાતમાં આવ્યા અને અમદાવાદ ખાતે ફાયરબ્રિગેડમાં ફાયરમૅન તરીકે જોડાઈ ગુજરાતમાં સ્થાયી થયા. સમયાંતરે એમના વંશજો ગુજરાત પોલીસમાં જોડાતા ગયા. સુધા પાન્ડેય્ એ આ બદ્રીપ્રસાદજીનાં પ્રપૌત્રી (સુધાજીના પિતા અને કાકા પણ ગુજરાત પોલીસમાં ડીવાયએસપી તરીકે નિવૃત્ત થયા છે).

સુધાનું ભણતર પિતાની બદલીઓને કારણે અલગ અલગ ઠેકાણે અને ઘણે અંશે સરકારી શાળામાં થયું. ગ્રૅજ્યુએશન ગાંધીનગરમાં અને પોસ્ટ ગ્રેજ્યુએશન ગૂજરાત યુનિવર્સિટીના ભાષા ભવનથી અંગ્રેજી સાહિત્યમાં ટૉપર રહીને પૂર્ણ કર્યું. પછી કેન્દ્રીય જાહેર સેવા આયોગ (યુપીએસસી)ની પરીક્ષામાં સારો સ્કોર થયો, પણ વૅકેન્સી ઓછી હોવાને કારણે સિલેક્શન ન થયું. આ દરમિયાન સુધાજીએ ખૂબ ઓછી તૈયારી સાથે ગુજરાત જાહેર સેવા આયોગ (જીપીએસસી)ની પરીક્ષા આપી અને નાયબ પોલીસ સુપરિન્ટેન્ડેન્ટ (ડીવાયએસપી) તરીકે પસંદગી પામી ૨૦૦૫માં ગુજરાત  પોલીસમાં જોડાયાં. ૨૦૧૧માં એમને આઈપીએસ કૅડરમાં નોમિનેશન મળ્યું.