આને કહેવાય શો સ્ટૉપર

ફૅશનના ગરબડ-ગોટાળાએ બનાવી દીધા ફૅશન શોના સ્ટાર!

- 

હરખભેર ઊછળતી-કૂદતી ઘરમાં દાખલ થયેલી આશીની કિલકારીએ બધાંને ચોંકાવી દીધાં. આવતાંવેંત એ ગીતાબહેનને બાઝી પડીઃ ‘મમ્મીજી, મને એક મોટો કૉન્ટ્રાક્ટ મળ્યો.'

‘હૈં? ક્યાં? શું? શેનો?’ ગીતાબહેને ટીવી સિરિયલમાં ચાલતી નાની કિકિયારીઓ પરથી ધ્યાન હટાવી આશીની મોટી કિલકારીમાં ધ્યાન પરોવ્યું.

‘મમ્મીજી, જુહૂની ફાઈવ સ્ટાર હોટેલના એક આલીશાન હૉલમાં ફૅશન શો થવાનો છે, એમાં બધી જ મોડલ્સના ચહેરા પર મેકઅપ અને હેરસ્ટાઈલ કરવાનો ઑર્ડર મને મળ્યો છે.’ પોતાનું બ્યુટી પાર્લર ચલાવતી આશીએ પોતાના હરખના છાંટાનો ચારેકોર છંટકાવ કર્યો.

‘વાહ, તો તો હુંય સરસ મેકઅપ કરી તૈયાર થઈને ફૅશન શો જોવા આવીશ. જોઉં તો ખરી, શું હોય. પહેલાં કોઈ દિવસ જોયો નથી.’

 ‘એકલાં તમે જ નહીં, બધાંને આવવાનું ઈન્વિટેશન છે. મેં એન્ટ્રી પાસ પણ લઈ લીધા છે.’ સાંભળી સૌની ઉત્સુકતા વધી ગઈ.

‘હું શું પહેરું? ત્યાં તો બધી સેલેબ્રિટીઓ હશે.’ ગીતાબહેનને ફિકર થવા માંડી.

શાક, તેલ અને અનાજના રોકેટગતિએ વધતા ભાવને લીધે મોંઘી થયેલી દિવાળીએ ઘરખર્ચનું બજેટ આમ પણ ખોરવી કાઢેલું. બાકી હતું તે અમુક મહેમાનો અણધાર્યા આવી ચડેલા એટલે દિવાળીની બોણીમાં પણ વધારે રૂપિયા આપવા પડેલા. ‘એમ કરું, નવરાત્રિ વખતે પહેરેલા ઘેરદાર ચણિયાનો ઘેર ટેલર પાસે ઓછો કરાવી, ચોળીમાં મૅચિંગ કાપડ મુકાવી એની લંબાઈ વધારી ચણિયા સાથે અટેચ કરાવું તો ઈવનિંગ ગાઉન બની જાય. ઓઢણીને જમીન પર ઘસડાય એવી સ્ટાઈલમાં ખભા ફરતે ઓઢીશ. પેલી બધીઓ એવું જ કરે છે.’ ટીવીમાં જોયેલા ફૅશન શોની મોડલો ગીતાબહેનને નજર સામે દેખાવા માંડી.

પોતાના અફલાતૂન આઈડિયા પર મુસ્તાક ગીતાબહેન એમના જાણીતા અફલાતૂન ટેલર્સ પાસે દોડ્યાં. આજ્ઞાંકિત માસ્ટરે ગીતાબહેનનો માસ્ટર પ્લાન વખાણી એ મુજબ ગાઉન તૈયાર કરી આપ્યો. જો કે ઘાટ કરતાં ઘડામણ મોંઘું થયું એ જુદી વાત છે.