મણિપુરનો મામલો હાથમાંથી સરકી જાય એ પહેલાં..

દિવસોની વણથંભી હિંસા ઈશાન ભારતનાં બીજાં રાજ્યોમાં ફેલાય ત્યાં સુધી રાહ જોઈ બેસી રહેવાને બદલે જરૂરી છે કે આ આગ ત્વરિત બુઝાવી નાખવામાં આવે. અલબત્ત, એ માટે મમત છોડવાની તૈયારી જોઈએ.

- હીરેન મહેતા

હિજરતનો વારો: મણિપુરમાં કુકી પ્રજા પર હમલાના વિડિયો વહેતા થયા એટલે પૂર્વોત્તરનાં બીજાં રાજ્યોમાં વસતા મૈતી લોકોને ઘર છોડી જવાની ધમકી મળવા લાગી.

સુરક્ષા નિષ્ણાતો છેલ્લા થોડા દિવસથી જે શક્યતા વ્યક્ત કરી રહ્યા હતા એવું જ મણિપુરમાં થઈ રહ્યું છે. ત્રણ મહિના અગાઉ શરૂ થયેલા હિંસાના છૂટાછવાયા બનાવ જોતજોતાંમાં દાવાનળની જેમ અડધા ઉપરાંતના રાજ્યમાં ફેલાઈ ગયા અને તબક્કાવાર હિંસાની ઘટના ચાલતી જ રહી. અધૂરામાં પૂરું, અગાઉની કોઈ ને કોઈ ઘટનાની વિડિયો ક્લિપ બહાર આવતી રહે છે, જે આગમાં ઘી હોમવાનું કામ કરે છે.

સંસદમાં આ મુદ્દે સરકાર અને વિપક્ષી સભ્યો વચ્ચે રાજકારણ રમાઈ રહ્યું છે. કોઈ અકળ કારણસર કેન્દ્ર સરકારે આ આખા મામલાને ઝાઝી ગંભીરતાથી લીધો નથી. કમ સે કમ અત્યાર સુધીના ઘટનાક્રમથી એવી છાપ તો પડી જ છે. અઢી મહિના સુધી મણિપુર મુદ્દે હરફ સુદ્ધાં ન ઉચ્ચારીને વડા પ્રધાન નરેન્દ્ર મોદીએ વિપક્ષી આગેવાનોને સરકારની ઘોર અવગણનાને નામે દોડવા માટે ઢાળ આપી દીધો. એ પછી મોદી બોલ્યા, પણ એ નાનકડું નિવેદન મણિપુરની હિંસાને ઠંડી પાડવામાં નિષ્ફળ નીવડ્યું છે. ઊલટું, છેલ્લા દસ દિવસમાં તો મણિપુરનો ઉદ્રેક ઈશાન ભારતનાં બીજાં રાજ્યોમાં પણ પ્રસરે એવી હવા છે.