ઘરની દીવાલમાં પડેલાં બાકોરાં બંધ કરો..

..તો બહારથી કોઈ ઘૂસી ન શકે. પંજાબમાં ફરી ખાલિસ્તાની વિભાજનવાદ માથું ઊંચકે એ પહેલાં આપણે એના છૂપા સમર્થકોને સાનમાં સમજાવી દેવાની જરૂર છે. એમાં કચાશ રહી તો અમ્રીતપાલ સિંહ જેવાં બીજાં માથાભારે તત્ત્વો દેશને પાછો આતંકના ખપ્પરમાં હોમી દેશે.

- હીરેન મહેતા

ખાલિસ્તાન તરફી આરોવાન અમ્રીતપાલ સિંહને શોધવા અને સ્થિતિ કાબૂમાં રાખવા પંજાબમાં વધારાની પોલીસ કુમક ઉતારવી પડી.

જેનો ડર હતો એ જ થયું. ધાંધલધમાલના કિસ્સામાં પકડાયેલા પોતાના સાથીદારોને છોડાવવા અમૃતસર નજીકના એક પોલીસસ્ટેશન પર રીતસર હુમલો કરાવનારા પંજાબના વિભાજનવાદી નેતા અમ્રીતપાલ સિંહ સામે રાજ્ય સરકારે નમતું જોખ્યું ત્યારે જ લાગતું હતું કે એ માણસ જતે દહાડે નબળા શાસકો સામે શિંગડા ભેરવશે. જેને ઊગતા ડામી દેવાની જરૂર હોય એ લોકોને માથે ચડાવીએ તો એ આજે નહીં તો કાલે, સાપ બનીને ડંખવાના જ છે.

અલગ ખાલિસ્તાનની ઉઘાડી તરફેણ કરી રહેલા વારિસ પંજાબ દે સંગઠનના નેતા અમ્રીતપાલે ગયા મહિને શક્તિ પ્રદર્શન કરી એના સાગરીતોને ધરાર પોલીસના તાબામાંથી છોડાવ્યા હતા. પંજાબની ભગવંત માન સરકારને ઘૂંટણિયે પાડી મોટો મીર માર્યો હોય એમ અમ્રીતપાલ તો પાછો ટોળા સાથે શીખ સમુદાયના અતિ પવિત્ર સ્થળ એવા સુવર્ણ મંદિરમાં હથિયારો લઈને માથું ટેકવવા ગયો. નવાઈની વાત એ છે કે સુવર્ણ મંદિર અને શીખ ગુરુઓની બેઠક ગણાતા અકાલ તખ્તની પવિત્રતાને ડાઘ લાગ્યો એમ છતાં સમાજમાંથી એ સામે ઝાઝો વિરોધ થયો નહીં.