નયના ગોરડિયા: લવ, લાઈફ અને લાફ્ટરસભર વાત..

પારિવારિક જવાબદારીને કારણે લેખક તરીકેની કારકિર્દીમાં એક દીર્ઘ અલ્પ-વિરામ આવી ગયો, પણ અભેરાઈ પર ચડી ગયેલી લેખનવૃત્તિ પરથી સમયની ધૂળ ખંખેરી એમણે હમણાં એક પુસ્તક પ્રગટ કર્યું છે. એમ તો છેલ્લા અઢી દાયકાથી એ દિલ્હીની એક સ્કૂલના સફળ સંચાલન પાછળનું પ્રેરણાબળ પણ બની રહ્યાં છે.

- કેતન ત્રિવેદી

હવે તો નવી દિલ્હીમાં ગુજરાતીઓનો દબદબો છે એવું કોઈને કહીએ તો કહીએ તો સામેવાળી વ્યક્તિ એમ જ સમજે કે વાત રાજકારણ અને નરેન્દ્ર મોદી-અમિત શાહની થઈ રહી છે. રાજકીય રીતે દિલ્હીમાં આજે ગુજરાતીઓનો દબદબો છે એની ના નહીં, પરંતુ રાજકારણ સિવાયનાં અન્ય ક્ષેત્રોમાં પણ ગુજરાતીઓ રાજધાનીમાં પોતાનું નામ કમાતાં આવ્યા છે એ વાત પણ ભૂલવા જેવી નથી, હોં!

હમણાં રાજધાનીમાં ફરતાં ફરતાં પ્રિયદર્શિનીની મુલાકાત આવાં જ એક પ્રતિભાસંપન્ન ગુજરાતી દંપતી સાથે થઈ. એક સમયે ભારતીય જનતા પક્ષના ગુજરાતમાંથી રાજ્યસભાના સભ્ય અને જનસંઘ સમયથી પક્ષની થિન્ક ટૅન્ક રહી ચૂકેલા પ્રફુલ્લ ગોરડિયાને તો બધા ઓળખતા જ હોય, પણ આજે વાત કરવી છે એમનાં પત્ની નયનાબહેનની. સંતાનોના ઉછેર અને પરિવારની જવાબદારીને કારણે નયનાબહેનની હમણાં સુધી લગભગ ઢંકાયેલી અને મૌન રહેલી વ્યક્તિગત ઓળખ અને પ્રતિભા લોકો સુધી બહાર નહોતી આવી, પણ એ હવે બહાર લાવવામાં કારણભૂત બન્યું છે એમનું જ એક પુસ્તક.

‘ધ મિડલ’: જૂના લેખોના સંગ્રહ સાથે ઉમેરાયાં અનેક સંભારણાં તો લૉર્ડ કર્ઝનના પુસ્તકે પણ અતીતમાં પ્રવાસ કરાવ્યો છે.

હા, ધ મિડલ નામનું અંગ્રેજીમાં લખાયેલું એમનું એક પુસ્તક આજકાલ ચર્ચામાં છે. ન જાણતા હો તો જાણી લો કે નયનાબહેન એક સમયે બહુ જાણીતાં કૉલમલેખક હતાં. ધ મિડલ નામની એમની કટાર પ્રતિષ્ઠિત અંગ્રેજી દૈનિક ટાઈમ્સ ઑફ ઈન્ડિયામાં આવતી. એ પછી બીજાં અખબારસામયિકોમાં પણ એ લખતાં રહ્યાં. લૉર્ડ કર્ઝનઃ લાસ્ટ ઑફ ધ બ્રિટિશ મુઘલ્સ નામનું એમનું પુસ્તક પણ દુનિયાભરની યુનિવર્સિટીઓ-પ્રકાશનોમાં ખૂબ ચર્ચાયું છે. વર્ષ ૧૯૧૧માં અંગ્રેજોએ એમની રાજધાની કોલકાતાથી દિલ્હી ખસેડી અને દિલ્હી દરબાર ભરાયો એના પર નાનકડું, પણ મહત્ત્વનો ઘટનાક્રમ આલેખતું પુસ્તક દિલ્હી દરબાર પણ પાટનગરની પાવર ગૅલરીમાં જાણીતું બન્યું હતું.

કૉલમલેખક તરીકે નયનાબહેનની કરિયર આ રીતે કદાચ આગળ વધી શકી હોત, પરંતુ કોઈ કારણસર બે દીકરીનાં ઉછેર, લગ્ન અને પારિવારિક જવાબદારીઓને કારણે બે-અઢી દાયકાથી લખવાનું છૂટી ગયેલું.