ആവേശം പകർന്ന് നാളികേരം

ഉൽപാദനം കുറഞ്ഞു

- കെ.ബി. ഉദയഭാനു ഇ-മെയിൽ: ajournalist5@gmail.​com

നാളികേര വിപണിയുടെ മുഖഛായ തന്നെ മാറ്റുന്ന വിധത്തിൽ ഉൽപന്നവില കുതിച്ചത് ഉൽപാദകർക്ക് ആവേശമായി. നാളികേര സീസൺ ജനുവരിയിൽ മാത്രമേ ആരംഭിക്കൂ. അതിനു മുൻപുള്ള 2 മാസം വിപണിയുടെ ആവശ്യാനുസരണം പച്ചത്തേങ്ങയും കൊപ്രയും ലഭ്യമാക്കാൻ തക്ക ഉൽപാദനം നിലവിലുണ്ടോയെന്നു സംശയം. ദക്ഷിണേന്ത്യൻ സംസ്ഥാനങ്ങളിൽ ഉൽപാദനം കുത്തനെ കുറഞ്ഞു. കാലാവസ്ഥമാറ്റമാണ് കാരണമെന്നു വിലയിരുത്തപ്പെടുന്നു. തമിഴ്നാട്ടിലും കർണാടകത്തിലും ഓഫ് സീസണായതിനാൽ വൻകിട തോട്ടങ്ങളിൽ നിന്നു ചരക്കുവരവ് പ്രതീക്ഷയ്ക്കൊത്ത് ഉയർന്നില്ല. ഇത് കൊപ്രയാട്ടു വ്യവസായത്തെ പിരിമുറുക്കത്തിലാക്കി. പല വൻകിട മില്ലുകാരും ഉൽപാദനം കുറച്ച് സ്റ്റോക്കുള്ള വെളിച്ചെണ്ണ ഉയർന്ന വിലയ്ക്കു വിൽക്കാൻ ശ്രമിച്ചു. ഇത്തരം പ്രതിസന്ധികളിൽ വ്യവസായികൾ നിത്യാവശ്യങ്ങൾക്ക് ലക്ഷ ദ്വീപിൽനിന്നും ആൻഡമാനിൽനിന്നും കൊപ്ര ശേഖരിച്ചിരുന്നു. എന്നാൽ, കാലാവസ്ഥമാറ്റം അവിടെയും വിളവിനെ ബാധിച്ചു. ദീപാവലി കഴിഞ്ഞതോടെ എണ്ണയ്ക്ക് ആവശ്യം അൽപം കുറഞ്ഞെങ്കിലും കൊപ്രാവിപണിയിലെ പ്രതിസന്ധി വിട്ടുമാറുന്നതു വരെ വിപണി കരുത്ത് നിലനിർത്താം. ഉത്സവദിനങ്ങളിൽ ഉണ്ടക്കൊപ്രയ്ക്കുണ്ടായ ശക്തമായ ഡിമാൻഡ് മില്ലിങ് കൊപ്രയും നേട്ടമാക്കി. ഒക്ടോബർ ആദ്യ മൂന്നാഴ്ചകളിൽ വെളിച്ചെണ്ണ 19,400 രൂപയിലും കൊപ്ര 13,000 രൂപയിലും സ്റ്റെഡിയായി നീങ്ങി.