കൃഷി കംപ്യൂട്ടറിലാക്കാൻ കാര്യസ്ഥനായി ഇആർപി

കൃഷിയിടത്തിൽ കാര്യക്ഷമത വർധിപ്പിക്കാൻ ഇആർപി സോഫ്റ്റ് വെയർ

- 

കൃഷിയുമായി ബന്ധപ്പെട്ട കണക്കുകളും പരിപാലനമുറകളും കൃത്യമായി എഴുതി സൂക്ഷിക്കുന്നവർ എത്ര പേരുണ്ടാവും? വിരലിലെണ്ണാവുന്നവർ മാത്രം. ബിസിനസുകാർ മുന്നേറുമ്പോഴും കൃഷിക്കാർ തളരുന്നതിന് ഒരു കാരണം ഇതു തന്നെ. ഓരോ ദിവസത്തെയും കാർഷികപ്രവർത്തനങ്ങൾ രേഖപ്പെടുത്തിവയ്ക്കുന്ന കർഷകന് അടുത്ത സീസണിൽ സ്വന്തം തെറ്റും ശരിയും തിരിച്ചറിഞ്ഞ് ശരി മാത്രം നടപ്പാക്കാൻ സാധിക്കും. ഏറ്റവും മികച്ച വിളവ് നേടിയ സാഹചര്യം ആവർത്തിക്കുകയും മോശം വിളവ് കിട്ടിയ സാഹചര്യം ഒഴിവാക്കുകയുമാകാം- സിംപ്ലിഫൈ അഗ്രിയിലൂടെ പാലക്കാട് മങ്കര സ്വദേശി റിജീഷ് രാജൻ ചെയ്യുന്ന പ്രധാന കാര്യവും ഇതുതന്നെ. കാർഷികപ്രവർത്തനങ്ങൾ കൃത്യമായും ലളിതമായും രേഖപ്പെടുത്തി സൂക്ഷിക്കുന്നതിനും അതിന്റെ അടിസ്ഥാനത്തിൽ ശരിയായ തീരുമാനങ്ങളെടുക്കുന്നതിനും സഹായിക്കുന്ന സോഫ്റ്റ്വെയർ ആണ് സിംപ്ലിഫൈ അഗ്രി.

കൃഷി ചെയ്യാൻ സോഫ്റ്റ്വെയർ? അതൊക്കെ കോർപറേറ്റ് കൃഷിയിലെ ആശയങ്ങളാണെന്നു കരുതുന്നവരാണ് ഏറെ. എന്നാൽ സോഫ്റ്റ്വെയറിന്റെ സഹായത്തോടെ കൃഷി പെർഫെക്റ്റ് ആക്കാമെന്നു കാണിച്ചു തരികയാണ് റിജീഷ്. ചെറുകിട കർഷകർക്കും കർഷക കൂട്ടായ്മകൾക്കുമൊക്കെ സമഗ്രമായ വിവരശേഖരത്തിന്റെ അടിസ്ഥാനത്തിൽ കൃത്യമായ തീരുമാനങ്ങൾ എടുക്കാൻ സഹായിക്കുന്ന സോഫ്റ്റ്വെയറാണിത്.