പാൽവില വർധന പരിഹാരമല്ല

തീറ്റച്ചെലവു കുറയ്ക്കൽ, ഉപഭോക്താക്കൾക്കു നേരിട്ടു വിപണനം, മൂല്യവർധന എന്നിവയിലൂടെ പാലുൽപാദനം ലാഭകരമാക്കാം

- ഡോ. പൊന്നുസ്വാമി, ഡോ. ഹിമ സുബിൻ മാത്യു**

കേരളത്തിൽ ഉൽപാദിപ്പിക്കുന്ന പാലിൽ ഏറിയ പങ്കും പാലായിത്തന്നെയാണ് വിറ്റഴിക്കപ്പെടുന്നത്. എന്നാൽ തൈര്, മോര്, നെയ്യ്, ചീസ്, പനീർ തുടങ്ങിയവയുടെ വിൽപനയിൽ ഈയിടെയായി വൻ വർധനയുണ്ട്. ജനസംഖ്യയുടെ വർധന, ജീവിതശൈലിയിലെ മാറ്റം എന്നിവയാണ് ഇവയുടെ ഡിമാൻഡ് കൂടാൻ കാരണം. നിർഭാഗ്യവശാൽ ഈ പുതിയ സാഹചര്യം ഉപയോഗപ്പെടുത്താൻ നമ്മുടെ ചെറുകിട ക്ഷീരകർഷകർക്കു കഴിയുന്നില്ല.

 ക്ഷീരകർഷകർ നേരിടുന്ന പ്രശ്നങ്ങളെന്തൊക്കെ.

കേരളത്തിലെ ക്ഷീരമേഖല ഒട്ടേറെ പ്രശ്നങ്ങൾ നേരിടുകയാണിപ്പോൾ. അവയിലേറ്റവും പ്രധാനം തീറ്റച്ചെലവിലെ വർധന തന്നെ.

കുത്തനെ കൂടുന്ന തീറ്റച്ചെലവ് കേരളത്തിൽ പാലുൽപാദനച്ചെലവിന്റെ സിംഹഭാഗവും കാലിത്തീറ്റയ്ക്കാണ്. വിവിധ പഠന റിപ്പോർട്ടുകൾ അനുസരിച്ചു പാൽ ഉൽപാദനച്ചെലവിന്റെ 70 ശതമാനവും കാലിത്തീറ്റയ്ക്കു വേണ്ടിയാണ്. വിപണിയിൽ ലഭ്യമായ കാലിത്തീറ്റയിലുള്ള അമിത ആശ്രിതത്വമാണ് ഈ സ്ഥിതിക്കു പ്രധാന കാരണം. അസംസ്കൃത വസ്തുക്കളുടെ ലഭ്യതയും വിലയുമനുസരിച്ചു കാലിത്തീറ്റവില ചാഞ്ചാടിക്കൊണ്ടിരിക്കും. കോവിഡും റഷ്യ-യുക്രെയ്ൻ യുദ്ധവും കാരണം അസംസ്കൃത വസ്തുക്കളുടെ ലഭ്യത കുറഞ്ഞതിനാൽ 40% വ രെ വിലവർധനയാണ് അടുത്ത കാല കാലിത്തീറ്റയ്ക്ക് ഉണ്ടായത്. കേര ളത്തിൽ കന്നുകാലി വളർത്തൽ ലാഭകരമാകണമെങ്കിൽ തീറ്റച്ചെലവു കുറച്ചേ പറ്റൂ.

സങ്കരയിനം പശുക്കളോടുള്ള അമിത പ്രിയം: കേരളത്തിൽ വളർത്തുന്ന പശുക്കളിൽ 80-90% സങ്കരയിനമാണ്. ശേഷിക്കനുസരിച്ചുള്ള ഉയർന്ന പാൽ ഉൽപാദനം ഇവയ്ക്കു സാധ്യമാകണമെങ്കിൽ മികച്ച പരിപാലനവും തീറ്റക്രമവും പാലിക്കണം. പച്ചപ്പുൽ ലഭ്യത കുറഞ്ഞ കേരളത്തിൽ ഇത്തരം പശുക്കളെ പരിപാലിക്കുന്നതും ഉൽപാദനച്ചെലവ് ഉയർത്തുന്നു. സങ്കരയിനം പശുക്കൾക്കു രോഗപ്രതിരോധ ശേഷി താരതമ്യേന കുറവായതിനാൽ രോഗസാധ്യതയും ചികിത്സച്ചെലവും കൂടുകയും ചെയ്യും.

അമിതമായ കൃത്രിമ ബീജസങ്കലനം: കേരളത്തിൽ കൃത്രിമ ബീജസങ്കലന നിരക്ക് വളരെ കൂടുതലാണ്. അതു മൃഗങ്ങളുടെ സ്വാഭാവിക ബീജസകലനത്തെയും ശാരീരിക പ്രവർത്തനങ്ങളെയും ബാധിക്കുന്നു. തൽഫലമായും രോഗപ്രതിരോധശേഷി കുറയുന്നു. സ്വാഭാവിക പ്രജനനത്തിന് അവസരം നൽകാതെ കൃത്രിമ മാർഗങ്ങൾ സ്വീകരിക്കുന്നത് ദീർഘകാലാടിസ്ഥാനത്തിൽ ദോഷമേ ചെയ്യൂ.