പൊതിയാത്തേങ്ങ പോലെ

കഥക്കൂട്ട്

- തോമസ് ജേക്കബ്

ഏതു നെടുങ്കൻ പ്രസ്താവന യ്ക്കും തോൽപിക്കാൻ കഴിയാത്ത ചില ഒറ്റയാൻ വാക്യങ്ങളുണ്ട്. അങ്ങനെ ചെറുപ്പം മുതൽക്കേ നമ്മോടൊപ്പം വളർന്ന ഒരു ഒറ്റയാൻ വാക്യം സി.വി.കുഞ്ഞുരാമന്റേതാണ്. അഭിപ്രായം ഇരുമ്പുലക്കയല്ല. ' അതിനു പകരം അഭിപ്രായം ഒന്നു മാറ്റിപ്പറയരുതെന്നുണ്ടോ എന്നോ കാലം മാറുമ്പോൾ എന്തിനാണ് മാറ്റം വരാത്തത് എന്നോ ആയിരുന്നു അദ്ദേഹം പറഞ്ഞതെങ്കിൽ നമ്മളാരെങ്കിലും കേരള കൗമുദി സ്ഥാപക പത്രാധിപരുടെ വാചകം ഓർമയിൽ വയ്ക്കുമായിരുന്നോ? അവതാരികകളിലെ സ്തുതി വായിച്ചിട്ട് പുസ്തകം വായിക്കുമ്പോഴുണ്ടാകുന്ന നിരാശയ്ക്കിടയിൽപോലും നാമൊന്നു ചിരിച്ചു പോകുന്നത് അയ്യപ്പപ്പണിക്കരുടെ "ഔദാരികകൾ' എന്ന പ്രയോഗം ഓർമിക്കുമ്പോഴല്ലേ? അടിക്ക് തിരിച്ചടി എന്ന് അണികളെ ഓർമിപ്പിക്കാൻ സിപിഐ (എം) സംസ്ഥാന സെക്രട്ടറി കൊടിയേരി ബാലകൃഷ്ണൻ 2016 ൽ പറഞ്ഞ പാടത്തെ പണിക്ക് വരമ്പത്തു കൂലി' ഏറെക്കാലം ഒരു വിവാദമായി കത്തിനിന്നു.