സുരേശേട്ടന്റെ സ്വന്തം കുഷാക്

"ന്നാ താൻ കേസ് കൊട് ' എന്ന സിനിമയിലെ സുരേശേട്ട നിലൂടെ മലയാളികളുടെ പ്രിയനടനായ രാജേഷ് മാധവന്റെ വാഹന, യാത്രാവിശേഷങ്ങളിലൂടെ

- വി എൻ രാഖി

സുരേശേട്ടന്റെയും സുമലതയുടെയും “ആയിരം കണ്ണുമായ് ഓട്ടോറിക്ഷ യിലെ പ്രണയം കേരളം മൊത്തം കയ്യടിച്ച് പ്രോത്സാഹിപ്പിച്ചതാണ്. എന്നാൽ രാജേഷിന്റെ ജീവിതത്തിലെ പ്രണയം സ്കോഡ കുഷാക്കിലാണ്. കൂടെയുള്ളത് ഭാവിവധു ദീപ്തിയും. വണ്ടിയെടുത്ത് ഒരുമാസം ആകുന്നതേയുള്ളൂ. നായകനായ ആദ്യ സിനിമ "ഹൃദയഹാരിയായ പ്രണയകഥ ഇറങ്ങിയതിന് ഒരാഴ്ച മുൻപാണ് കുഷാക് കയ്യിലെത്തിയത്. പെട്രോൾ 1.5 പുതിയ മോഡൽ ബ്ലാക് എലഗൻസ്. അതിന്റെ ത്രില്ലിലാണ് രാജേഷ് മാധവൻ. "കൊക്കിലൊതുങ്ങുന്ന ഒരു വണ്ടി' വേണമെന്നേ ഉണ്ടായിരുന്നുള്ളൂ. ചെറിയൊരു വണ്ടി. എനിക്ക് ഓടിക്കാനുള്ള കോൺഫിഡൻസ് തോന്നണം. പിന്നെ സൗകര്യവും മാത്രമാണു നോക്കിയത്. അത്രയേ ഉണ്ടായിരുന്നുള്ളൂ ഡിമാൻഡ്. GLA Benz സെക്കൻഡ്ഹാൻഡ് ആണ് ആദ്യം നോക്കിയത്. അതിലും നല്ലത് ഫ്രഷ് ആയി കുഷാക് എടുക്കുന്നതാണെന്നു തോന്നി. കാർ, യാത്രാവിശേഷങ്ങൾക്ക് രാജേഷ് പതിയെ ആക്സിലറേറ്റർ ചവിട്ടി.

അപ്രീലിയയിൽ കറക്കം

രാത്രിയൊക്കെ യാത്ര വേണ്ടി വരുന്നതു കൊണ്ട് വണ്ടിയെടുക്കുമ്പോൾ സേഫ്റ്റിയും വലിയൊരു കൺസേൺ ആയിരുന്നു. പിന്നെ കാറിന്റെ സൈഡ് സീറ്റിൽ ഇരുന്ന് യാത്ര ചെയ്ത് നല്ല ശീലമായതു കൊണ്ട് എൻജിന്റെ പ്രവർത്തനത്തെക്കുറിച്ചൊക്കെ നല്ല ധാരണ കിട്ടിയിരുന്നു. കുറേ വണ്ടികൾ നോക്കി. പക്ഷേ, സ്കോഡയോട് പണ്ടേ ചെറിയൊരു ചായ്വുണ്ടായിരുന്നു. ഫൈനൽ ലിസ്റ്റിൽ ഫോക്സ്വാഗൺ ടൈഗുണും കോഡ് കുഷാകുമാണ് വന്നത്. കാണാൻ കൂടുതൽ ഭംഗി കുഷാക് ആണെന്നു തോന്നി. അങ്ങനെ ഒടുവിൽ അതു തീരുമാനമായി. ടെസ്റ്റ് ഡ്രൈവിന് പോയപ്പോൾ ഫുൾ ഹാപ്പി. കാറു വാങ്ങാൻ കാശു വേണമല്ലോ. പോക്കറ്റിൽ നിന്നെടുത്ത് വണ്ടി വാങ്ങാനുള്ള സമ്പാദ്യമൊന്നും സിനിമയിൽ നിന്നു കിട്ടിത്തുടങ്ങിയിട്ടില്ല. അതുകൊണ്ട് മുഴുവൻ ലോണിലാണ് കാറ് കയ്യിലെത്തിയത്. ആദ്യമായി സ്വന്തമാക്കിയ വാഹനം അപ്രീലിയ സ്കൂട്ടർ ആണ്. അതിൽ കേരളം മൊത്തം കറങ്ങിയിട്ടുണ്ട്.

സൈക്കിളിൽ ഹരിശ്രീ