വേനൽക്കാല പരിചരണം

ചൂടിൽനിന്നും പൊടിയിൽനിന്നും രക്ഷനേടാൻ ചില പൊടിക്കൈകൾ.

- റോഷ്നി പൊൻകാട്ട്

ചൂടു കൂടുകയാണ്..വേനൽക്കാലത്തു വാഹനങ്ങൾക്കും പ്രത്യേക പരിചരണം ആവശ്യമാണ്. കാലാവസ്ഥാ വ്യതിയാനങ്ങൾ മൂലമുള്ള കടുത്ത ചൂടും അന്തരീക്ഷ മലിനീകരണവും വാഹനങ്ങളെ ബാധിക്കും. എല്ലാകാലത്തും മുടങ്ങാതെ നടത്തിപ്പോരുന്ന പരിശോധനകൾ ചൂടുകാലത്ത് അൽപം ജാഗ്രതയോടെ ചെയ്യാം.

വൈപ്പർ സംരക്ഷണം

വിൻഡ് ഷീൽഡിൽ പൊടി പറ്റിയിരിക്കു മ്പോൾ നേരിട്ട് വൈപ്പർ ഉപയോഗിക്കാതിരിക്കുക. ദീർഘനേരം പാർക്ക് ചെയ്യേണ്ടി വരുകയാണെങ്കിൽ വൈപ്പർ പൊക്കിവയ്ക്കുക. വൈപ്പറിലെ റബർ ഘടകം വിൻഡ്ഷീൽഡ് ഗ്ലാസുമായി സമ്പർക്കം വരുമ്പോൾ ദൃഢമാകും. പിന്നീട് വൈപ്പർ പ്രവർത്തിപ്പിക്കുമ്പോൾ ഗ്ലാസിൽ ഉരഞ്ഞ് പാടുകൾ വരും. വിൻഡ് ഷീൽഡ് ഗ്ലാസിൽ പൊടിയുണ്ടെങ്കിൽ ആദ്യം ഒരുകുപ്പി വെള്ളം ഒഴിച്ച് പൊടി നീക്കം ചെയ്തശേഷം മാത്രം വൈപ്പർ പ്രവർത്തിപ്പിക്കുക. വിൻഡ് ഷീൽഡ് സൊലൂഷൻ നിറച്ചുവയ്ക്കാൻ മറക്കരുത്.

പൊടി വില്ലനായാൽ

ഇന്റീരിയർ എപ്പോഴും ക്ലീൻ ആയിരിക്കാൻ ശ്രദ്ധിക്കണം. പൊടിയും മറ്റും അടിഞ്ഞു കൂടിയിട്ടുണ്ടെങ്കിൽ എസി ഓൺ ചെയ്യുമ്പോൾ ഈ പൊടിയും എസി വെന്റിലേക്ക് ആഗിരണം ചെയ്യപ്പെടും. പൊടി കേറിയാൽ ഇവാപ്പറേഷൻ യൂണിറ്റ് അടഞ്ഞു പോകും. എസി ഫിൽറ്റർ ഉപയോഗിക്കുന്നത് ഒരുപരി ധിവരെ പൊടി അടിയുന്നതു തടയും. പൊടി കൂടാതെ എസി വെന്റിൽ ഈർപ്പം ഉള്ളതിനാൽ ബാക്ടീരിയ, ഫംഗസ് തുടങ്ങിയ സൂക്ഷ്മജീവികളും ഈന്റീരിയറിൽ ഉണ്ടാകും. ഇവ പലവിധ അസുഖങ്ങൾക്കും അലർജി, വിട്ടുമാറാത്ത തുമ്മൽ എന്നിവയ്ക്കും കാരണമായേക്കാം. ഈർപ്പം, ബാക്ടീരിയ, ഫംഗസ് തുടങ്ങിയവ നീക്കം ചെയ്യാൻ സാനിറ്റൈസർ ചെയ്യുന്നതു നല്ലതാണ്.

പാർക്കിങ്ങിൽ ശ്രദ്ധിക്കേണ്ടത്

വെയിലത്താണു വാഹനം പാർക്ക് ചെയ്യുന്നതെങ്കിൽ വൈപ്പർ പൊക്കിവയ്ക്കുക വിൻഡ് ഷീൽഡിൽ ഏൽക്കുന്ന ചൂട് വൈപ്പർ ബ്ലേഡ് റബറിന്റെ കാഠിന്യം കൂട്ടും. ക്രമേണ വൈപ്പർ ബ്ലേഡിന്റെ സ്മൂത്ത്നെ സ് പോകുകയും വൃത്തിയായ വൈപ്പിങ് സാധ്യമാകാതെ വരുകയും ചെയ്യും. വൈപ്പർ ബ്ലേഡ് പെട്ടെന്നു മാറേണ്ടിയും വരാറുണ്ട്.

വാഹനം മൂടിയിടുമ്പോൾ ഒരു കാര്യം ശ്രദ്ധിക്കുക. നല്ല കാറ്റടിക്കുന്ന ഇടങ്ങളിൽ ഈ കവർ ഇളകി പെയിന്റിങ്ങിൽ പലടിയത്തും പോറൽ ഏൽക്കാറുണ്ട്. ഇരുണ്ട നിറമുള്ള വാഹനത്തിൽ ഇത്തരം പോറലുകൾ പെട്ടെന്നു തന്നെ കണ്ണിൽ പെടുന്നവയാണ്.