ഡാക്കർ റാലിയിലെ മലയാളിപ്പെരുമ!

ഡാക്കർ റാലിയിൽ കിരീടം നേടുന്ന ആദ്യ ഇന്ത്യക്കാരനും മലയാളിയുമാണ് തൃശൂർ സ്വദേശി ഹാരിത് നോവ

- കെ. ശങ്കരൻകുട്ടി

ഡാക്കർ റാലിയിൽ വിജയം കൊയ്ത ത്രില്ലിലാണു ഹാരിത് നോവ. സൗദിയിലെ യാൻബുവിൽ നടന്ന ലോക പ്രശസ്തമായ ഡാക്കർ റാലിയിൽ റാലി 2വിൽ മലയാളിയായ ഹാരിത് നോവ ഒന്നാം സ്ഥാനം നേടി. പ്രധാന റാലികളിലൊന്നിൽ പോഡിയം ഫിനിഷ് നേടുന്ന ആദ്യ ഇന്ത്യൻ താരം എന്ന നേട്ടമാണ് ഇതിലൂടെ ഹാരിത് കൈവരിച്ചത്. ഷെർകോ ടിവിഎസ് റാലി ഫാക്ടറിക്കുവേണ്ടി മത്സരിച്ച ഷൊർണൂർ സ്വദേശി ഹാരിത് 54 മണിക്കൂർ, 24 മിനിറ്റ്, 44 സെക്കൻഡ് കൊണ്ടാണു മത്സരം പൂർത്തിയാക്കിയത്. ഓവറോൾ ബൈക്ക് റാങ്കിങ്ങിൽ (റാലി ജിപി+റാലി 2) 11-ാം സ്ഥാനം നേടാനും ഹാരിതിനായി. 2018ൽ ദേശീയ സൂപ്പർ ക്രോസ് ചാംപ്യ നായിരുന്നു. 2012ൽ ആണു ടിവിഎസ് ടീമംഗമായത്. 2021ൽ ഡാക്കർ റാലിയിൽ 20-ാം സ്ഥാനത്തെത്തിയിരുന്നു.

അഞ്ചോ ആറോ വയസ്സിൽ തുടങ്ങിയതാണ് ഓഫ് റോഡ് ഡ്രൈവിങ്ങിനോടുള്ള ഇഷ്ടം. വിദേശത്തായിരുന്ന പിതാവ് റാഫി ആയിടയ്ക്കു വന്നപ്പോൾ പാരിസ് ഡാക്കർ ചാംപ്യൻഷിപ്പിന്റെ സിഡി കൊണ്ടുവന്നു. റേസിങ്ങിലെ മകന്റെ താൽപര്യം കണ്ടാണ് അതു സമ്മാനിച്ചത്.

ഏഴാം ക്ലാസരെ ഷൊർണൂരിലായിരുന്നു പഠനം. പിന്നീടു കൊടൈക്കനാലിലേക്കു മാറി. 2009ൽ 16-ാം വയസ്സിലാണ്, ഒരു ബൈക്ക് സമ്മാനമായിക്കിട്ടിയത്. ആ സമയത്തുതന്നെ അസീസ് മെമ്മോറിയൽ റേസ് എന്ന പ്രാദേശിക റാലിയുടെ പരിശീലനം നടന്നിരുന്നു, വീടിനടുത്തുള്ള വയലിൽ. എന്നും അതു കാണാൻ പോകുമായിരുന്നു. പിതാവിന് അതിന്റെ സംഘാടകരുമായി അടുപ്പമുണ്ടായിരുന്നതിനാൽ ഹാരിതിനെയും പങ്കെടുപ്പിക്കാൻ സമ്മതിച്ചു. ഏറ്റവും ഒടുവിലായാണു മത്സരം തീർത്തതെങ്കിലും ഓഫ് റോഡ് ബൈക്ക് റേസ് എന്ന സ്വപ്നം ശക്തമായി. 2010ലും കേരളത്തിൽ നടന്ന ചില റാലികളിൽ പങ്കെടുത്തിരുന്നു.

ആദ്യ രാജ്യാന്തര റാലി