മിന്നലിൽ വലയുമോ ചാർജിങ്

മഴക്കാലത്ത് ഇലക്ട്രിക് വാഹനത്തിന്റെ സുരക്ഷയും പ്രവർത്തനക്ഷമതയും നിലനിർത്താൻ അവശ്യമായ മുൻകരുതലുകൾ

- ഡെൽന

ഇലക്ട്രിക് സ്കൂട്ടറിനോടു ചങ്ങാത്തമായിട്ട് മാസങ്ങൾ കുറച്ചാകുന്നതേയുള്ളൂ. ഒച്ചപ്പാടുകളില്ല, അനാവശ്യ ചെലവുകളില്ല. ദിവസം കഴിയുന്തോറും "ഇവി'യോട് ഇഷ്ടം കൂടിവരികയാണ്.

അങ്ങനെയിരിക്കെയാണു മഴയിങ്ങെത്തിയിരിക്കുന്ന ത്. ഇനിയിപ്പോൾ ചെളിയായി വെള്ളമായി... ഒപ്പം സംശയങ്ങളുടെ ഇരമ്പവും മനസ്സിൽ മിന്നിത്തുടങ്ങി. ഇലക്ട്രിക് വണ്ടി വെള്ളത്തിലിറക്കിയാൽ ഓക്കെയാണോ? മിന്നലുള്ളപ്പോൾ ചാർജിങ്ങിനു കുത്തിയിട്ടാൽ പ്രശ്നമാകുമോ? സംശയങ്ങൾ തീരുന്നേയില്ല.

മഴക്കാലത്തു ശ്രദ്ധിക്കാം

ചാർജിങ് ചെയ്യുന്നതിനു മുൻപ്, ചാർജിങ് പോർട്ടും കേബിളും മുഴുവനായും ഈർപ്പമില്ലാതാണെന്ന് ഉറപ്പാക്കുക.

മേൽക്കൂരയുള്ള ചാർജിങ് സ്റ്റേഷനുകൾ ഉപയോഗിക്കുക.

കഴിയുന്ന പക്ഷം മേൽക്കൂരയ്ക്കു കീഴിലോ ഷെൽട്ടറിലോ ചാർജിങ് സ്റ്റേഷനുകൾ ഇൻസ്റ്റാൾ ചെയ്യുക.

കനത്ത മഴയിലോ മിന്നലുണ്ടാകുമ്പോഴോ ചാർജ് ചെയ്യരുത്. ഇത് വൈദ്യുത അപകടസാധ്യത കുറയ്ക്കാൻ സഹായിക്കും.

ചാർജിങ് കേബിളുകൾ ഉണങ്ങിയതും വൃത്തിയുള്ളതുമായിരിക്കണം. പുറത്തു ചാർജിങ് ചെയ്യുമ്പോൾ നിലവാരമുള്ള വെതർ പ്രൂഫ് എക്സ്റ്റൻഷൻ കോഡുകൾ മാത്രമേ ഉപയോഗിക്കാവൂ.