കുട്ടികളുടെ പോക്കറ്റ് മണി സമ്പാദ്യമാക്കാം

സമ്പത്തു കാലത്തു നടുന്ന തൈകളാണു നിക്ഷേപങ്ങൾ.വരുമാനം എങ്ങനെ സുരക്ഷിതമായ നിക്ഷേപമാക്കാം എന്നു ചിന്തിക്കുന്നവർക്ക് മാർഗനിർദേശങ്ങൾ നൽകുന്ന പംക്തി...

- നിഖിൽ ഗോപാലകൃഷ്ണൻ സിഇഒ, പെന്റാഡ് സെക്യൂരിറ്റീസ്

എന്നാണ് ആദ്യമായി ബാങ്ക് അക്കൗണ്ട് ആരംഭിച്ചതെന്ന് ഓർമയുണ്ടോ? ആദ്യ ജോലി കിട്ടിയപ്പോഴോ, ലോൺ എടുക്കുന്നതിന്റെ ഭാഗമായോ ഒക്കെയാകുമല്ലേ? എന്നാലിന്ന് ഒരു കുഞ്ഞു ജനിക്കുമ്പോൾ തന്നെ ബാങ്ക് അക്കൗണ്ട് തുടങ്ങാം. ഇതിനായി കുഞ്ഞിന്റെ ബെർത് സർട്ടിഫിക്കറ്റ് മാത്രം മതി.

പാൻ കാർഡും മറ്റ് രേഖകളും അമ്മയുടെയോ അച്ഛന്റെയോ നൽകാം. ഒരു വർഷത്തിനുള്ളിൽ കുഞ്ഞിന്റെ ആധാർ വിവരങ്ങൾ ബാങ്കിൽ നൽകണം. കുഞ്ഞിനു സമ്മാനമായി കിട്ടുന്ന പണം ഈ അക്കൗണ്ടിൽ നിക്ഷേപിക്കാം.

അതേ അക്കൗണ്ടിൽ ഒരു എസ്ഐപി കൂടി ആരംഭിക്കാം. കുട്ടിക്കു വരുമാനമാകുന്നതുവരെ മാതാപിതാക്കൾക്ക് എസ്ഐപി അടയ്ക്കാം. കുട്ടിയുടെ ഉന്നത വിദ്യാഭ്യാസത്തിനും മറ്റും പണം ആവശ്യമായി വരുമ്പോൾ ഈ തുക ഉപകരിക്കും. അക്കൗണ്ടിലെ തുകയുടെ വലുപ്പത്തിനപ്പുറം സമ്പാദ്യശിലത്തിന്റെ നല്ല വശങ്ങൾ ഇതുവഴി കുട്ടികൾക്കു പകർന്നു നൽകാം.

കുട്ടികളറിയട്ടെ സാമ്പത്തിക സ്വാതന്ത്ര്യം

എത്ര നേരത്തെ പണം കൈകാര്യം ചെയ്യാൻ അനുവദി ക്കുന്നുവോ അത്ര നേരത്തെ കുട്ടി സാമ്പത്തിക അച്ചടക്കത്തിന്റെ ബാലപാഠങ്ങൾ അറിഞ്ഞു തുടങ്ങും. വീട്ടിലേക്ക് വാങ്ങേണ്ട സാധനങ്ങളുടെ ലിസ്റ്റ് തയാറാക്കുമ്പോഴും ഷോപ്പിങ്ങിനു പോകുമ്പോഴും കുട്ടികളെ ഒപ്പം കൂട്ടാം.