പാടുകളെ പാട്ടിനു വിടേണ്ട

മുഖത്തും ചർമത്തിലും ഉണ്ടാകുന്ന പാടുകൾ ചിലപ്പോഴെങ്കിലും മറ്റു പല രോഗങ്ങളുടെയും ലക്ഷണങ്ങളാകാറുണ്ട്

- ശ്യാമ

എന്താണ് മുഖത്തൊരു മഞ്ഞപ്പ്? കഴിഞ്ഞ തവണ വന്നപ്പോൾ ഇങ്ങനെയില്ലായിരുന്നല്ലോ. ബ്യൂട്ടീഷ്യനാണ് ആ ചോദ്യം ആദ്യമായി തൊടുത്തുവിട്ടത്. മുഖത്തെ നിറവ്യത്യാസം വീട്ടിലെ കണ്ണാടിയിൽ കണ്ടെങ്കിലും അതങ്ങ് പൊക്കോളും' എന്നാണു കരുതിയത്. പക്ഷേ, പാർലറിൽ നിന്നിറങ്ങും വഴി ഡോക്ടറെ കൂടി കണ്ടിട്ടു മടങ്ങാമെന്നു നിശ്ചയിച്ചതു നന്നായി. ആ മഞ്ഞ നിറം കിഡ്നി പ്രശ്നത്തിന്റെ ലക്ഷണമാണെന്നും ഇപ്പോഴെങ്കിലും വരാൻ തോന്നിയതു ഭാഗ്യമായി എന്നുമാണു ഡോക്ടർ പറഞ്ഞത്.

സ്ത്രീകളിൽ പലരും എല്ലാവരുടേയും കാര്യം നോക്കുന്നവരാണ്. എന്നാൽ സ്വന്തം കാര്യം വരുമ്പോൾ പിന്നെയാവട്ടേ എന്ന നയവും. ഇത്തരം പിന്നെയാവട്ടെ രീതികൾ പലപ്പോഴും നഷ്ടപ്പെടുന്നത് സ്വന്തം ആരോഗ്യം തന്നെയാകും. നമ്മളെയല്ല നമ്മൾ മാറ്റി വയ്ക്കേണ്ടതെന്ന് എപ്പോഴും ഓർക്കാം.

പാടുകൾ പല വിധം

ചർമത്തിൽ പല തരത്തിലുള്ള പാടുകൾ കാണാം. ഇവയിൽ പെട്ടെന്നു ശ്രദ്ധിക്കുന്നതും എടുത്തു കാണുന്നതും മുഖത്തെ പാടുകളാണ്.

മെലാസ്മ അല്ലെങ്കിൽ കരിമംഗല്യം: പ്രായമായ സ്ത്രീകളിലാണ് ഇവ സാധാരണമായി ഉണ്ടാകുക. ആർത്തവവിരാമത്തോട് അടുക്കുന്ന സ്ത്രീകളിലും ഗർഭിണികളിലും കൂടുതലായി കാണാറുണ്ട്. കടും ബ്രൗൺ നിറത്തിലോ ഇളം ബ്രൗൺ നിറത്തിലോ ഇരുകവിളുകളിലും പാടുകൾ വരും. മൂക്കിന്റെ പാലത്തിലേക്കും നെറ്റിയിലേക്കും ഇവ പടരാറുമുണ്ട്. ചിലർക്ക് എക്സ്ട്രാ ഫേഷ്യൽ മെലാസ്മ എന്ന അവസ്ഥ കാരണം കയ്യിലും പാടുകളുണ്ടാകാറുണ്ട്.

ഹോർമോൺ വ്യതിയാനത്തിന്റെ സമയത്താണ് ഇവ സാധാരണയായി വരുന്നത്. ജനിതകപരമായി മെലാസ്മ കൈമാറ്റം ചെയ്യാനുള്ള സാധ്യതയും ഏറെയാണ്. സൂര്യരശ്മിയുമായി സമ്പർക്കം വന്നാൽ മെലാസ്മ കൂടാം. അതുകൊണ്ട് കഴിവതും വെയിൽ ഏൽക്കുന്നതു കുറയ്ക്കുക.

അക്കാൻന്തോസിസ് നൈഗ്രിക്കാൻസ് : കൗമാരക്കാരിൽ കൂടുതലായി കാണുന്ന ഒന്നാണിൽ. വണ്ണമുള്ള കുട്ടികളിലാണ് അധികമായി കാണപ്പെടുന്നത്. കൂടാതെ മാസമുറ തെറ്റി വരുന്നവർ, ഹോർമോൺ പ്രശ്നങ്ങളുള്ളവർ പിസി ഒഡി അലട്ടുന്നവർ, ചെറുപ്പത്തിലേ പ്രമേഹം വന്നവർ തുടങ്ങിയവരിലും ഈ അവസ്ഥ കാണാം.

വായ്ക്ക് ചുറ്റും നെറ്റിയുടെ വശങ്ങളിലും കഴുത്തിന്റെ പിന്നിലും കക്ഷങ്ങളിലും തുടയിടുക്കിലും മറ്റ് ഇടുങ്ങിയ ഭാഗങ്ങളിലും ചർമം കറുത്തു കട്ടിയായി കാണപ്പെടും. പരിഹാരമാർഗങ്ങളായി പ്രധാനമായും നിർദേശിക്കുന്നത് വണ്ണം കുറയ്ക്കുക, വ്യായാമം ചെയ്യുക എന്നിവയാണ്.