ഇഷ്ടമുള്ളതു മാത്രം പഠിക്കാം

സാധാരണ ഡിഗ്രിയിൽ നിന്നു നാലു വർഷ ബിരുദ പ്രോഗ്രാമിനു എന്തെല്ലാം പ്രത്യേകതകളാണ് ഉള്ളത്? സംശയങ്ങൾക്ക് വിദഗ്ധ മറുപടി

- ഡോ. എ.എസ്. സുമേഷ് കൺവീനർ, റൂൾസ് റഗുലേഷൻസ് സബ് കമ്മിറ്റി ഫോർ FYUGP എംജി യൂണിവേഴ്സിറ്റി, കോട്ടയം

നാലുവർഷ ബിരുദ പ്രോഗ്രാമുകളിലൂടെ കേ രളത്തിലെ വിദ്യാഭ്യാസരംഗം മാറുകയാണ്. പക്ഷേ, നിലവിലെ സമ്പ്രദായത്തിൽ നിന്ന് എന്തെല്ലാം മാറ്റങ്ങളാണ് ഉണ്ടാകുക എന്ന കാര്യത്തിൽ മാതാപിതാക്കൾക്കും വിദ്യാർഥികൾക്കും ഒരുപാടു ചോദ്യങ്ങളുമുണ്ട്. പൊതുവായ സംശയങ്ങളും അവയ്ക്കുള്ള വിദഗ്ധ മറുപടിയും ഇതാ.

പരമ്പരാഗത ബിരുദ പഠനത്തിൽ നിന്നുള്ള പ്രധാന വ്യത്യാസങ്ങൾ എന്തൊക്കെയാണ് ?

കേരളത്തിലെ ബിരുദ പഠനത്തിൽ കാതലായ മാറ്റമാണു നാലു വർഷ ബിരുദ പഠനം ലക്ഷ്യമാക്കുന്നത്. പുതിയ രീതിയിൽ പഠനം ക്ലാറിയിൽ മാത്രം ഒതുങ്ങി നിൽക്കുന്ന ഒന്നല്ല. പ്രായോഗിക പരിശീലനവും ഉണ്ടാകും. സയൻസ് വിഷയങ്ങളുടെ കാര്യത്തിൽ മാത്രമല്ല എല്ലാ വിഷയങ്ങളിലും ഇതുണ്ടാകും. ഗ്രൂപ്പ് ചർച്ചകൾ, സെമിനാറുകൾ, അഭിമുഖങ്ങൾ, വ്യവസായ ശാല സന്ദർശനം അങ്ങനെ പല കാര്യങ്ങൾ ഉൾപ്പെടുന്നതാണു പാഠ്യപ്രവർത്തനം.

പുതിയ പ്രോഗ്രാമിൽ മൂന്നു രീതിയിൽ ബിരുദം പൂർത്തീകരിക്കാം. മൂന്നു വർഷം കൊണ്ടോ അല്ലെങ്കിൽ രണ്ടര വർഷം കൊണ്ടോ മൂന്നു വർഷ ബിരുദം നേടാം.

നാലു വർഷത്തിൽ ഓണേഴ്സ് അല്ലെങ്കിൽ ഓണേഴ്സ് വിത് റിസർച്ച് ബിരുദം നേടാം. ഓണേഴ്സ് ബിരുദം മൂന്നര വർഷത്തിലും പൂർത്തിയാക്കാം. ഇഷ്ടമില്ലാത്തത് പരീക്ഷ പാസാകാൻ വേണ്ടി ക്ലേശിച്ച് പഠിക്കേണ്ടതുമില്ല. പകരം അഭിരുചിയുള്ള വിഷയം ആഴത്തിൽ പഠിക്കാം. പ്രോഗ്രാമിന്റെ ഭാഗമായി ഇന്റേൺഷിപ്പ് ഉണ്ട്. പ്രായോഗിക പരിശീലനം കൂടി പഠനത്തിനൊപ്പം ചേരുന്നതിനാൽ ഇഷ്ടമുള്ള മേഖലയിൽ മികച്ച തൊഴിൽ നേടുക താരതമ്യേന എളുപ്പമാകും.

മറ്റൊരു പ്രത്യേകത ബിരുദ പഠനത്തിനായി തിരഞ്ഞടുത്ത മേജർ വിഷയം ആവശ്യമെങ്കിൽ മാറ്റാനുള്ള അവസരമാണ്. ഇനി മുതൽ ഒരു പോലെയുള്ള പരീക്ഷകൾ ആയിരിക്കില്ല മറിച്ചു വിഷയത്തിലെ അറിവും മികവും തെളിയിക്കാൻ അവസരം നൽകുന്ന മൂല്യനിർണയ രീതികളാകും.