നിശബ്ദതയല്ലോ സുഖപ്രദം

ഇത്തിരി ശബ്ദം കൂടുതൽ കേട്ടാൽ അതിലിപ്പോ എന്തു ദോഷം വരാനാണ് എന്നു ചിന്തിക്കുന്നവരാണോ?

- ശ്യാമ

അപ്പു. വയസ്സ് 15. ഉറക്കത്തിൽ പോലും ചെവിയിൽ ഹെഡ്ഫോൺ ഉണ്ടാകും. അടുത്തിടെ ചെവിയിൽ ഇരപ്പു കൂടുന്നതിനാൽ ഇഎൻടി ഡോക്ടറെ ഗൂഗിളിൽ തിരയുമ്പോഴാണ് അപ്പുവിന്റെ മുത്തച്ഛന്റെ എൻട്രി.

മുത്തച്ഛൻ അപ്പുവിനെയും കൂട്ടി വീടിന്റെ കോണിലുള്ള മുറിയിൽ പോയി വാതിലടച്ചു. ചെവിയിൽ നിന്നു ഹെഡ്ഫോൺ മാറ്റി അൽപനേരം കണ്ണടച്ചിരിക്കാൻ പറഞ്ഞു.

രണ്ടു മിനിറ്റ് കഴിഞ്ഞതും മുത്തച്ഛൻ ചോദിച്ചു, “എന്താ അപ്പു ഇപ്പോൾ കേൾക്കുന്നത്?' അപ്പുവിന്റെ ചിരി കലർന്ന മറുപടി വന്നു “ഒന്നുമില്ല. '

 "കണ്ണു തുറക്കൂ' മുത്തച്ഛൻ അപ്പുവിനോടു പറഞ്ഞു, "ഇതാണ് സൈലൻസ്... നിശബ്ദത. ഇതിന്റെ വിലയാണ് നീ ഇത്രയും നാൾ മനസ്സിലാക്കാതെ പോയത്. ഇതുതന്നെയാണു നിന്റെ പ്രശ്നങ്ങൾക്കുള്ള പരിഹാരവും.

കാതടപ്പിക്കുന്ന ശബ്ദങ്ങൾ

 ഇവിടെ അത്ര വലിയ ശബ്ദമില്ലല്ലോ എന്നു തോന്നുമ്പോഴും ഉച്ചത്തിലെവിടെയോ ഫാൻ കറങ്ങുന്നുണ്ടാകാം, ഫാക്ടറിയിലെ മെഷീനുകൾ മുരളുന്നുണ്ടാകാം. വീടുപണിക്കായി സിമന്റും ചരലും കുഴയ്ക്കുന്ന ശബ്ദം, ആരോ ഉച്ചത്തിൽ പാട്ടു വച്ചിരിക്കുന്ന ശബ്ദം, ആഘോഷങ്ങൾ പ്രമാണിച്ചുള്ള വെടിക്കെട്ടിന്റെ ശബ്ദം...