വിശേഷം സമ്മാനിച്ച മേൽവിലാസം

2024 ലെ കുടുംബപ്രേക്ഷകരുടെ ഹൃദയം കവർന്ന “വിശേഷം' സിനിമയുടെ നായകനും, എഴുത്തുകാരനും, സംഗീത സംവിധായകനും ആയ ആനന്ദ് മധുസൂദനൻ മനസ്സ് തുറക്കുന്നു...

- രജനി കൃഷ്ണ

2024 ലെ കുടുംബപ്രേക്ഷകരുടെ ഹൃദയം കവർന്ന “വിശേഷം' സിനിമയുടെ നായകനും, എഴുത്തുകാരനും, സംഗീത സംവിധായകനും ആയ ആനന്ദ് മധുസൂദനൻ മനസ്സ് തുറക്കുന്നു...

കുട്ടിക്കാലം തൊട്ട്, സംഗീതത്തോട് താൽപ്പര്യം ഉണ്ടായിരുന്നു. പണ്ട് ഒരു ചായപ്പൊടിയുടെ പരസ്യത്തിൽ ഉസ്താദ് സാക്കീർ ഹുസൈൻ തബല വായിക്കുന്നത് കണ്ട് അദ്ദേഹത്തെപ്പോലെ തബലിസ്റ്റ് ആകണം എന്നാഗ്രഹിച്ചു. പക്ഷേ ആ കാലത്ത് നാട്ടിൽ തബല പഠിപ്പിക്കാൻ ആളുകൾ ഇല്ലാതിരുന്നതുകൊണ്ട് അച്ഛൻ ചെണ്ട പഠിപ്പിക്കാൻ ചേർത്തു. ചെണ്ട, തായമ്പക എല്ലാം എന്റെ ഉള്ളിലെ സംഗീതത്തോടുള്ള ഇഷ്ടം കുറെക്കൂടെ ഊട്ടി ഉറപ്പിച്ചു. അങ്ങനെയാണ് സ്കൂൾ വിദ്യാഭ്യാസം കഴിഞ്ഞ് ചെന്നൈയിൽ സൗണ്ട് എഞ്ചിനീയറിംഗ് പഠിക്കാൻ തീരുമാനിച്ചത്. ഉള്ളിലെ സംഗീതസംവിധായകനെ പരിപോഷിപ്പിക്കാൻ പരസ്യചിത്രങ്ങൾ സഹായിച്ചു. ആ കാലത്താണ് സംവിധായകൻ രഞ്ജിത്ത് ശങ്കർ സാർ ആദ്യമായിട്ട് ഒരു സിനിമയിലേക്ക് സംഗീതസംവിധായകൻ ആയി എന്നെ ക്ഷണിക്കുന്നത്. എന്നാൽ നിർഭാഗ്യം എന്നുപറയട്ടെ, ആ സിനിമ പല കാരണങ്ങൾ കൊണ്ട് നടന്നില്ല. അതിന് പിന്നാലെ രഞ്ജിത് സാർ തന്നെയാണ് "മോളി ആന്റി റോക്ക്സ്' എന്ന സിനിമയിലേക്ക് എന്നെ വിളിക്കുന്നത്. അതിലെ പാട്ടുകൾക്കോ സംഗീതത്തിനോ വലിയ അഭിനന്ദനങ്ങൾ ഒന്നും ലഭിച്ചിരുന്നില്ല. എന്നുമാത്രമല്ല, അതിനു ശേഷം ആഗ്രഹിച്ചപോലെ വലിയ അവസരങ്ങൾ ഒന്നും എന്നെ തേടിയെത്തിയതുമില്ല.