ഒരു പുതിയ തുടക്കത്തിലേക്ക്..

അച്ഛനും സഹോദരങ്ങളും അഭിനയരംഗത്തുണ്ടായിരുന്നിട്ടും, വൈകിയാണെങ്കിലും ഓഡിഷനിലൂടെ വെള്ളിത്തിരയിലേക്ക് കടന്നുവന്നിരിക്കുകയാണ് മലയാളത്തിന്റെ മഹാനടൻ കൊട്ടാരക്കര ശ്രീധരൻനായരുടെ ഇളയ മകൾ ശൈലജ. അഭിനയരംഗത്തേയ്ക്ക് ചുവടുവച്ച ശൈലജ തന്റെ പുതിയ വിശേഷങ്ങൾ മഹിളാരത്നം വായനക്കാരുമായി പങ്കുവയ്ക്കുന്നു...

- തയ്യാറാക്കിയത്: സായ് രാജലക്ഷ്മി, ചെറുശ്ശേരി മന

ജീവിതത്തിലും, അഭിനയത്തിലും അച്ഛൻ ശൈലജയെ എങ്ങനെയൊക്കെ സ്വാധീനിച്ചിട്ടുണ്ട്? അച്ഛന്റെ സിനിമകളെ എങ്ങനെ വിലയിരുത്തുന്നു ?

അച്ഛനാണ് എന്നെ എപ്പോഴും സ്വാധീനിച്ചിട്ടുള്ളത്. അച്ഛന്റെ മകളായി ജനിച്ചത് ഏറ്റവും വലിയ ഭാഗ്യമായാണ് ഞാൻ കരുതുന്നത്. അച്ഛൻ വളരെ സാധാരണക്കാരനായി ജീവിച്ച ഒരാളാണ്. അച്ഛൻ അഭിനയിച്ച "മൈ ഡിയർ കുട്ടിച്ചാത്തൻ' എന്ന സിനിമ അച്ഛനോടൊപ്പം പോയിക്കണ്ടത് ഓർമ്മയുണ്ട്. ഞാൻ ഏഴാം ക്ലാസിൽ പഠിക്കുമ്പോഴാണ് അച്ഛന്റെ പെട്ടെന്നുള്ള വിയോഗം.

വേലുത്തമ്പിദളവ, ചെമ്മീൻ, കുഞ്ഞാലിമരയ്ക്കാർ, അരനാഴികനേരം, യാചകൻ, ജന്മഭൂമി. അങ്ങനെ അച്ഛൻ അഭിനയിച്ച് എത്രയെത്ര കഥാപാത്രങ്ങൾ... ഏത് കഥാപാത്രമായാലും അച്ഛൻ സ്വയം സമർപ്പിച്ചാണ് അഭിനയിക്കുന്നതെന്ന് അമ്മ പറഞ്ഞു കേട്ടിട്ടുണ്ട്. ആ കഥാപാത്രങ്ങളായി അച്ഛൻ ജീവിക്കുകയാണെന്ന് നമുക്ക് തോന്നിപ്പോകും. അന്നത്തെയും ഇന്നത്തെയും പ്രേക്ഷകർ ഇഷ്ടപ്പെടുന്ന രീതിയിലുള്ള അഭിനയമായിരുന്നു അച്ഛന്റേത്.

അതുല്യനടൻ സായ്കുമാർ ആണ് ശൈലജയുടെ സഹോദരൻ അദ്ദേഹത്തിന്റെ അഭിനയം എങ്ങനെയൊക്കെ സ്വാധീനിച്ചിട്ടുണ്ട് ? അച്ഛനെപ്പോലെ അണ്ണനും ഏത് കഥാപാത്രമായിരുന്നാലും വളരെ അനായാസമായാണ് അഭിനയിക്കുന്ന എത്ര വ്യത്യസ്തങ്ങളായ കഥാപാത്രങ്ങളാണ് അണ്ണൻ ചെയ്തിരിക്കുന്നത്. അച്ഛന്റെയും, അണ്ണന്റെയും ചേച്ചിയുടെയും ഒക്കെ അഭിനയങ്ങൾ കണ്ടു വളർന്നതു കൊണ്ടാകും എന്നെ സ്വാധീനിച്ചിട്ടുള്ളത് എപ്പോഴും അവരാണ്. അവരുടെ പേരിന് കളങ്കമുണ്ടാക്കാത്ത രീതിയിൽ അഭിനയിക്കണമെന്നാണ് എന്റെ ആഗ്രഹം.

അഭിനയത്തിൽ തന്റേതായൊരു ശൈലി ഉണ്ടാക്കിയെടുത്ത മലയാളത്തിലെ മികച്ച അഭിനേത്രികളിൽ ഒരാളാണ് ശൈലജയുടെ സഹോദരി ശോഭാമോഹൻ അഭിനയരംഗത്തേയ്ക്ക് വന്നപ്പോൾ ചേച്ചിയുടെ അഭിപ്രായം എന്തായിരുന്നു ?

ശോഭചേച്ചി നേരത്തെ എന്നെ അഭിനയരംഗത്തേയ്ക്ക് വിളിച്ചിരുന്നതാണ്. അന്നൊക്കെ ഞാൻ ഒഴിഞ്ഞുമാറിയിരുന്നു. ഇപ്പോൾ ഞാൻ അഭിനയിക്കുമ്പോഴുണ്ടാകുന്ന പോരായ്മകളും, ശ്രദ്ധിക്കേണ്ട കാര്യങ്ങളും ഒക്കെ ചേച്ചി പറഞ്ഞുതരാറുണ്ട്. ഒരു മുൻപരിചയവും ഇല്ലാതെയാണ് ഞാനിപ്പോൾ വന്നിരിക്കുന്നത്. ശോഭചേച്ചീടെ മക്കൾ വിനുമോഹൻ, അനുമോഹൻ, ജയശ്രീചേച്ചീടെ മകൻ അനിൽ പപ്പൻ, മറ്റ് ചേച്ചിമാരും ഒക്കെ എന്റെ അഭിനയം കണ്ട് അഭിപ്രായങ്ങൾ പറയാറുണ്ട്.