சீரான வாழ்வருளும் சிவவடிவங்கள்

மகாசிவராத்திரி 18-2-2023

- அனந்தபத்மநாபன்

1. அகத்தீஸ்வரர்

தமிழ் வளர்த்த சான்றோர்களில் முதன்மை பெற்றவர் அகத்தியர். கடல்கொண்ட மதுரையில், முதற்சங்கம் இருந்த காலத்தில், அதில் தலைமைப் புலவராகச் சிவபெருமான் வீற்றிருந்தபோது, முதன்மைப் புலவனாக இருந்து தமிழ் ஆராய்ச்சி செய்த தனிப்பெரும் புலவர். அசுரகுலத்து இராவணன் தமிழர்களுக்கு இன்னல்களை விளைத்த போது, அவனைத் தனது இசையால் வென்று இலங்கைக்கு ஓட்டியவர். தமிழகம் சிறந்து விளங்குவதற்குக் காரணமான காவிரியாற்றையும், தாமிரபரணியாற்றையும் தந்தவர்.
சிவனருள் பெற்ற தவயோகி.

சிவபெருமான், இவருக்காகவே கயிலைமலையில் நடைபெற்ற தனது திருமணக்கோலக் காட்சியைத் தென்னகத்தில் இருபத்தியோரு இடங்களில் மீண்டும் மீண்டும் காட்டினார் என்றால், இவருடைய பக்தியின் பெருமையை நம்மால் அளவிடமுடியுமா? சிவபெருமான், அகத்தியரையும் அவர் செய்கின்ற சிவபூஜையையும் பெரிதும் விரும்புகின்றான் என்பதைத் தேவாரம் ‘‘அகத்தியனை உகப்பானை’’ என்று போற்றுகின்றது.

2. அக்னீஸ்வரர்

உலகின் ஆக்கசக்திக்கு ஆதாரமாக இருப்பது ‘‘தீ’’ என்ற நெருப்பாகும். உயிர்கள் தோன்றி இன்பமடைதல் பொருட்டுப், பரமசிவத்தால் முதலில் ஆகாசமும் அதனுள் வளிமண்டலமும், அதிலிருந்து தீயும், தீயிலிருந்து நீரும், நீரிலிருந்து நிலமும் படிப்படியாகத் தோற்றுவிக்கப்பட்டன. இந்த ஐந்து பொருட்களின் கூட்டுச்சேர்க்கையால் உலகமும் அதில் உயிர்த்தொகுதியும் மண், கல், மலை முதலான சடப்பொருட்களும் தோன்றியுள்ளன.  

மேற்குறித்த ஐந்து மூலப்பொருட்களான ஆகாயம், காற்று, தீ, நீர், நிலம் ஆகியவற்றுள் ‘‘தீ’’ ஒன்றாக இருந்தாலும் அது மற்ற நான்கு பொருட்களிலும் மறைந்து நின்று, அவற்றைத் தொழிற்படுத்தும் சக்தியாகவும் விளங்குகிறது. எடுத்துக்காட்டாக, ‘‘தீ’’ வானில் மின்னல் இடியாகவும், நிலத்தில் உள்ள எரிமலையாகவும், கடலுக்குள் வடவைத் தீயாகவும், காற்றுக்குள் உரசற்தீயாகவும் மறைந்து நின்று செயல்படுகின்றது.