மர்ஹும் அஷ்ரபின் ஒலுவில் வீடுமற்றும் காணி தென்கிழக்குப் பல்கலைக்கழகத்துக்கு கையளிப்பு

ஸ்ரீ லங்கா முஸ்லிம் காங்கிரஸின் ஸ்தாபக தலைவர் மர்ஹும் எம்.எச்.எம். அஷ்ரப், ஒலுவில் பிரதேசத்தில் நிர்மாணித்திருந்த வீடு, தென்கிழக்குப் பல்கலைக்கழகத்துக்கு உரிமை மாற்றம் செய்யப்பட்டு ஒப்படைக்கப்பட்டுள்ளது.

- எம்.வை. அமீர்

தென்கிழக்குப் பல்கலைக்கழகத்தின் பதில் உபவேந்தர் கலாநிதி யூ.எல். அப்துல் மஜீத் தலைமையில் உபவேந்தரின் அலுவலகத்தில் கடந்த திங்கட்கிழமை இடம்பெற்ற நிகழ்வின்போது, மர்ஹூம் எம்.எச்.எம். அஷ்ரப்பின் மகன் அமான் அஷ்ரப், இதற்கான ஆவணங்களை, பதில் உபவேந்தர் உள்ளிட்ட நிர்வாகத்தினரிடம் கையளித்தார்.

முன்னாள் அமைச்சரும் ஸ்ரீ லங்கா முஸ்லிம் காங்கிரஸின் ஸ்தாபக தலைவருமான மர்ஹும் எம்.எச்.எம். அஷ்ரப்புக்கு உள்நாட்டிலும் வெளிநாடுகளிலும் நிறைய சொத்துக்கள் இருப்பதாக அவருடைய அரசியல் எதிரிகள் பல்வேறு குற்றச்சாட்டுக்களை முன்வைத்திருந்த போதிலும், அஷ்ரப் அவரின் பெயரில் வைத்திருந்த, ஒரேயொரு அசையாச் சொத்து இந்த ஒலுவில் வீடுதான் என, இதன்போது அவரின் மகன் அமான் அஷ்ரப் தெரிவித்தார்.

தென்கிழக்குப் பல்கலைக்கழகத்தை 1995 இல் எம்.எச்.எம். அஷ்ரப் உருவாக்கியதன் மூலம் இந்த பிராந்தியத்தினதும் முஸ்லிம் சமூகத்தினதும் உயர் கல்விக்கு பெரும் பங்காற்றினார்.