తార్కిక శక్తిని పెంచే కథలు

మర్యాద రానున్న అంటే మర్యాదకు, విజ్ఞతకు మారు పేరు.

- - షేక్ అబ్దుల్ హకీం జాని

మర్యాద రానున్న అంటే మర్యాదకు, విజ్ఞతకు మారు పేరు. ఎటువంటి వ్యాజ్యం తన వద్దకు వచ్చినా దానిని పరిష్కరించడం తార్కిక అతనికి వెన్నతో పెట్టిన విద్య. తప్పు చేసినవారు ఎంతటి వారైనా సరే తన యుక్తితో మర్యాదరామన్న కనిపెట్టేవారు.కొన్ని వందల సంవత్సరాల క్రితం నిజంగా జరిగినవి అని చెప్పుకుంటున్న ఈ కథలను తొలుత ఎవరూ గ్రంథస్థం చేయలేదు. పెద్దల నుండి ఆ నోటా, ఈ నోటా విని తెలుసుకున్నవే. ఈ కథలన్నీ పిల్లల బుద్ధికి పదును పెట్టేవిగాను, తార్కిక శక్తిని పెంచుతాయనడంలో ఎటువంటి సందేహం లేదు. నేడు పెరిగిపోతున్న సాంకేతిక పరిజ్ఞానం వల్ల అందుబాటులో ఉన్న ఈ కథల్ని చాలా మంది గ్రంథస్థం చేశారు. సామాజిక మాధ్యమాల ద్వారా కూడా వెలుగులోకి తెస్తున్నారు. ఎవరి శైలి వారిది. ఎవరికి తోచినట్లు వారు గ్రంథస్థం చేసి ఈ కథల్ని ప్రజల్లోకి తీసుకుని వెళుతున్నారు.

రామన్న తల్లిదండ్రులు, భార్యల పేర్ల విషయంలో కూడా ఎటువంటి ఆధారాలు లేవు. మందమతి అయిన మర్యాదరామన్న ఒక్కసారిగా ఎలా మేధావి అయ్యాడు? అనే విషయంపై కూడా భిన్న కథనాలు వినిపిస్తున్నాయి. కాళికాదేవి ప్రసన్నం కావడం వల్ల జ్ఞాని అయ్యాడని కొన్ని కథనాలు ప్రచారంలో ఉన్నాయి. ఒక సాధువు రామన్న నాలుకపై బీజాక్షరాలు రాయడం వల్ల మహాజ్ఞాని అయ్యాడని మరికొన్ని కథనాలు ప్రచారంలో ఉన్నాయి.

సమస్యలను నిశితంగా పరిశీలించి తద్వారా ఎవరికీ అన్యాయం జరగకుండా మర్యాద రామన్న చెప్పిన తీర్పులు నేటి తరం వారిలో సైతం ప్రేరణ కలిగిస్తాయి.

మందమతి అయిన ఒక మేధావిగా మారి, కొంత కాలం గ్రామాలలో న్యాయాధికారిగా ఉండి, ఎన్నో తీర్పులు చెప్పి ప్రజల ప్రశంసలందుకున్నాడు. ఆ తరువాత రాజాశ్రయం పొంది రాజుగారి ప్రశంసలందుకుని, ఆయన ఆశీస్సులతో తానే అయిదేళ్ళపాటు రాజుగా పట్టాభిషేకం చేయించుకుని అనేక తీర్పులు ఇచ్చారు. ఆయన చెప్పిన తీర్పులను అందరూ శిరోధార్యంగా భావించేవారు. తరువాత రామన్న రాకుమార్తెను వివాహం చేసుకుని రాజ్యాధికారాన్ని చేపట్టి న్యాయమార్గంలో ప్రజల్ని పాలించారు. ఇంకో కథనం ప్రకారం రామన్న ఒక సందర్భంలో అడవి కన్యను కూడా వివాహం చేసుకున్నట్లు గాథలు ప్రచారంలో ఉన్నాయి.మర్యాదరామన్న కథలు పిల్లలనే కాదు పెద్దలను సైతం ఆకర్షిస్తాయి. మర్యాద రామన్న ఏ ప్రాంతానికి చెందినవారో? ఏ రాజుల ఆశ్రయం సంపాదించారో? ఎవరి కొలువులో ఎక్కువ రోజులు ఉండి తీర్పులు చెప్పారో? ఇలాంటి ప్రశ్నలకు కచ్చితమైన సమాధానాలు లేవు.