వరప్రదాయక వినాయకుల ఆలయం

ప్రథమ పూజ్యుడు శ్రీ వినాయకునికి హిందూ దేవాలయాలలో ఉన్న ప్రాధాన్యం వివరించలేనంత గొప్పది అని చెప్పవచ్చు. శివ, విష్ణు, దేవీ ఆలయాలు అన్న బేధం లేకుండా ప్రతి క్షేత్రంలో మొదట దర్శనమిచ్చేది ఏకదంతుడే.

- - ఇలపావులూరి వెంకటేశ్వర్లు

ప్రథమ పూజ్యుడు శ్రీ వినాయకునికి హిందూ దేవాలయాలలో ఉన్న ప్రాధాన్యం వివరించలేనంత గొప్పది అని చెప్పవచ్చు. శివ, విష్ణు, దేవీ ఆలయాలు అన్న బేధం లేకుండా ప్రతి క్షేత్రంలో మొదట దర్శనమిచ్చేది ఏకదంతుడే.

విఘ్న వినాయకుడు ఉపాలయాలలోనే కాకుండా ప్రధాన దైవంగా కొలువు తీరిన దేవాలయాలు మన దేశంలో చాలా ఉన్నాయి. కానీ తమిళనాడు రాష్ట్రం దిండిగల్ పట్టణంలో మరెక్కడా లేని విధంగా ఒకే ప్రాంగణంలో ఒకేచోట నూట ఎనిమిది వినాయక మూర్తులు ఉండటం ప్రత్యేకంగా చెప్పుకోవాలి.

ప్రధాన వినాయక విగ్రహం ముప్పై రెండు అడుగుల ఎత్తు ఉంటుంది. పీఠంతో కలిసి యాభై అడుగుల ఎత్తైన విగ్రహంగా ప్రసిద్ధి చెందినది. దైవభక్తులు అందరినీ ఆకర్షించే ఈ దేవాలయంలో అనేక దేవతామూర్తులు కొలువై పూజలు అందుకొంటున్నారు. ఈ అరు ఆలయం వెనుక వెయ్యి సంవత్సరాల చరిత్ర ఉన్నట్లు తెలుస్తోంది.

స్థానికంగా 'నన్మై తరుమ్ నూటెట్టు వినాయక కోవిల్ అని పిలిచే ఈ ఆలయం ఒకప్పుడు చిన్న మండపం అని చెబుతారు.

చారిత్రక గాథ

సుమారు వెయ్యి సంవత్సరాల క్రితం స్థానిక నీటి అవసరాల నిమిత్తం ఒక పెద్ద చెఱువు తవ్వించాలని నిర్ణయించారట అప్పటి పాలకులు. చెఱువు తవ్వుతున్న సమయంలో ఒక వినాయక విగ్రహం ఏనాటిదో బయల్పడినదట. చెఱువు గట్టునే చిన్న మండపం కట్టించి, స్థానికులు పూజించడం ప్రారంభించారు. క్రమంగా భక్తులకు కలుగుతున్న అనుభవాలు, మారుతున్న వారి స్థితిగతులు స్వామివారి వరప్రదాయకుడు అన్న విశ్వాసం ప్రజలలో ఏర్పడింది.