ప్రాచీన తెలుగులో ప్రాకృత పరిమళం

తెలుగు భాషా సాహిత్యాలకు, దేశానికి, సంస్కృతికి, నవ్యతకు సంబంధించిన వికాసం కోసం అనవరతం 'శ్రమించిన మారేపల్లి రామచంద్రశాస్త్రి

- జయసూర్య

తెలుగు భాషా సాహిత్యాలకు, దేశానికి, సంస్కృతికి, నవ్యతకు సంబంధించిన వికాసం కోసం అనవరతం 'శ్రమించిన మారేపల్లి రామచంద్రశాస్త్రి, ఆంధ్రదేశంలో మొట్టమొదటి గ్రంథమాలికా ప్రచురణకు పూనుకొన్న తెలుగుభాషా ప్రేమికులు, సాధ్యమైనంతవరకు సంస్కృతాన్ని ఉపయోగించకుండా, తెలుగంటే ఆరోప్రాణంగా ‘నుడికడలి’ పేరుతో తెలుగు భాషాసాహిత్యాలకు, దేశానికి, సంస్కృతికి సంబంధించిన సాహితీ సంస్కరణాయుత నిర్మాణాన్ని 1945 ప్రాంతాలలో ఆయన తలపెట్టారు. ఉత్తరాలలో 'క్షేమం' అనడానికి 'మేల్', దేశం, ప్రాంతం చెప్పాల్సి వచ్చినప్పుడు 'నాడు', 'నిఘంటువు'ను 'నుడిదండ', గ్రంథాలయాన్ని 'పొత్తపు గుడి' వంటి, తెలుగు పదాలను ఉపయోగించేవారు. పరాయి భాషల నుండి తెలుగుభాషలోని పదాలు ఏయే మార్పులు, కూర్పులు, చేర్పులు, నేర్పుల ద్వారా ఇప్పటి వ్యవహారంలోకి వచ్చాయో, మన పూర్వకవులు కావ్య, ప్రబంధ సాహిత్యాలలో ఆ పదాలను భావప్రకటన కోసం ఎలా వాడుకున్నారో సందర్భానుసారంగా నిఘంటువులో సూచించే పదాల అర్థవివరణ ‘మచ్చునుడు'లలో చేర్చారు. తెలుగులో వాడుకలో ఉన్న సామెతలను కూడా ఆధారంగా చూపించారు. ఆయన మహత్తర కృషి తీవ్రవిస్మరణకు గురికావడం మన దౌర్భాగ్యం.