ఆభరణాలకు భారత్ పుట్టినిల్లు

భారతీయ నాగరికతలో ఆభరణాలకు సుమారు 8000 సంవత్సరాల క్రితం నుంచి ప్రాధాన్యత సంతరించుకుంది

- ఐ.ప్రసాదరావు

"భవిష్యత్తులో 10 గ్రాములు బంగారం ధర లక్ష రూపాయలకు చేరుతుంది" అనే భావన నిజం కాబోతున్న వేళ... అసలు ఈ బంగారం, వెండి, విలువైన రాళ్లు (నవరత్నాలు), వజ్రాలు వంటి వాటితో తయారు చేసిన ఆభరణాలకు భారతీయులు ఎందుకు ఇంత ప్రాధాన్యత ఇస్తారో... ఒకసారి చరిత్ర తిరగేస్తే సబబుగా ఉంటుందేమో!

భారతీయ నాగరికతలో ఆభరణాలకు సుమారు 8000 సంవత్సరాల క్రితం నుంచి ప్రాధాన్యత సంతరించుకుంది అని తెలుస్తోంది. భారతీయ సమాజంలో రాజకీయ ఆర్థిక సాంస్కృతిక చిహ్నంగా ఆభరణాలు గతం నుంచి నేటి వరకూ ప్రధాన పాత్ర పోషిస్తున్నాయి.మనలో చాలామంది తరచూ 'కోహినూర్ వజ్రం' అని అంటుంటాం. మా అమ్మాయి/అబ్బాయి బంగారం అని తరచూ సంబోధిస్తాం. అంటే ప్రతీ మంచి విషయంలో, విజయంలో ఈ మాటలు వాడుతూ ఉంటాం. ఈ విధంగా మన జీవితంలో మమేకమైన ఈ ఆభరణాల చరిత్ర పరిశీలిద్దాం.హరప్పా మెహంజోదా రోలో జరిగిన ఆర్కియా లజికల్ తవ్వకాలలో లభించిన ఆధారాలను బట్టి ఆనాడే హరప్పా మెహంజోదారోలో ప్రజలు బంగారం, వెండి విలువైన రాళ్లతో తయారు చేసిన వివిధ ఆభరణాలు ధరించినట్లు, వివిధ దేశాలతో ఆభరణాల వ్యాపారం చేసినట్లు తెలుస్తోంది.తదుపరి మౌర్యులు, గుప్తులు, చోళులు, పల్లవులు, చాళుక్యులు, మహమ్మదీ

యులు, మొఘలులు, పోర్చుగీసు, బ్రిటిష్ వారి కాలంలో ఆభరణాలకు ప్రాధాన్యత సంతరించుకోవడంతో పాటు రకరకాల డిజైన్లతో మారుతున్న కాలానికి అనుగుణంగా భారతీయులను ఆకర్షిస్తూ ఆభరణాలు ప్రముఖ పాత్ర పోషించాయి. క్రీ.పూ. 1500నాడే. సింధు ప్రజలు బంగారంతో తయారైన చెవిరింగులు, నెక్లెస్లు, పూసల నెక్లెసులు, మెటల్స్ తో తయారైన ఆభర ణాలు ధరించినట్లు తెలుస్తోంది.ముఖ్యంగా సింధూ నాగరికత కాలంలో 'పూసల' వర్తకం బాగా జరిగింది. వివిధ రకాల పూసలు తయారు చేయడంలో, రంగులు అద్దటంలో సింధు ప్రజలు ఆరితేరినట్లు కనపడుతుంది. హిందూ మతానికి సంబంధించిన వివిధ గుర్తులు, చిహ్నాలతో పూసలు తయారు చేసుకుని, ధరించేవారు.