Breinvliesontsteking eis student

Chris Scheffers (19), die matiestudent van Riebeek-Wes wat verlede Saterdag (2 Augustus) dood in sy kamer by die Dagbreek-koshuis gevind is, het weens breinvliesontsteking gesterf, het die Universiteit Stellenbosch in hul nuutste verklaring met betrekking tot Scheffers se dood bevestig.

- Charlotte Lesch

Scheffers, wat in die Swartland grootgeword het, was 'n tweedejaar-teologiestudent. Sy grootmaak-ma, Izolda Majiedt, wat hom saam met haar man, Fanie, reeds op die ouderdom van drie maande saam met sy biologiese ma (wat intussen oorlede is), in hul huis verwelkom het, sê Chris was 'n kind van die Here.

"My enigste troos as 'n ma is om te weet hy is by die Here," voeg sy hartseer by.

Haar aangenome seun het in die eerste kwartaal van sy onderwysstudies aan Majiedt gesê dit is nie vir hom nie. Hy wil teologie studeer.

Dié skielike verandering van loopbaan het as geen verrassing vir haar en almal wat hom geken het, gekom nie. Die kinders op skool by Schoonspruit Sekondêr en die studente by Dagbreek-koshuis het hom "pastor" genoem aangesien hy die evangelie verkondig het, vertel sy laggend.

Scheffers se gawe om te kan sing, is op driejarige ouderdom in die VGK-gemeente in Riebeek-Kasteel ontbloot.

"Hy het basies in die kerk grootgeword en was ook in die kerkkoor waar ek betrokke is. Ons albei het 'n passie vir kerkmusiek; daar het ons mekaar aangevul."

Sy musikale talent het nie by sy nootvaste stem opgehou nie. Scheffers het die gawe gehad om verskeie musiekintrumente te speel, wat hy self aangeleer het.

"Chris was 'n model-kind wat op skool altyd sy beste wou gee. Hy was 'n uitstekende leerder."

Majiedt onthou met vreugde hoe Scheffers in die middae ná skool sy tas neergesit en eers op sy kitaar of trekklavier getokkel het voordat hy met die dag se huiswerk sou wegspring.

Hy het in Riebeek-Wes-primêr en Schoonspruit-sekondêr opgang gemaak toe hy aan vertonings deelgeneem en sy talent met ander gedeel het.

"Hy het verlede jaar in die universiteit se koor gesing," vertel sy trots. "Ek het hom my babakind genoem. Hy het lig aan almal gebring. Chris was die sonskyn in ons huis."