નગરચર્યાએ નીકળેલા નાથને નીરખી લાખો શ્રદ્ધાળુઓ ભાવવિભોર બન્યા

મેઘરાજાએ ૧૪૮મી રથયાત્રા પર અમીછાંટણાં કરી ભગવાન જગન્નાથજીને વહાલથી વધાવ્યા ‘જય રણછોડ, માખણચોર'ના નાદ સાથે સમગ્ર અમદાવાદ શહેર ભક્તિમય બની ગયું

- 

‘કર્ણાવતીમાં વાગી ઝાલરું, અષાઢી બીજ ઊજવાય, જય જગન્નાથજી, રૂપકડે રથડે રે જગન્નાથ જોવા મળે...' આજે અમદાવાદના કણ-કણમાં જાણે જગતના નાથ વસ્યા હોય તેવું અનુભવાઈ રહ્યું છે અને સમગ્ર બ્રહ્માંડ ભગવાનનું સ્વાગત મન મૂકીને કરી રહ્યું હોય તેવું લાગી રહ્યું છે. આજે ભગવાન જગન્નાથજી, બહેન સુભદ્રાજી અને ભાઇ બલરામજી સાથે અમદાવાદની નગરચર્યાએ નીકળ્યા છે, જેમને વધાવવા માટે લાખો ભક્તો ઊમટી પડ્યા છે. ગુજરાતના મુખ્યપ્રધાન ભૂપેન્દ્ર પટેલે પહિન્દવિધિ કર્યા બાદ નિયમિત સમય કરતાં દસ મિનિટ વહેલી રથયાત્રા નીકળી હતી. રથયાત્રા નીકળી ત્યારે ‘જય રણછોડ, માખણચોર’, ‘જય દ્વારિકાધીશ’ના ગગનભેદી નાદથી સમગ્ર વાતવરણ ભક્તિમય બની ગયું હતું. આ લખાય છે ત્યાં સુધી રથયાત્રા અમદાવાદ મ્યુનિસિપલ કોર્પોરેશન વડી કચેરી ખાતે પહોંચી છે કારણ કે આજે સવારે ગજરાજ બેકાબૂ થતાં રથયાત્રામાં ભારે દોડધામ મચી ગઇ હતી.