Hekkie-flater trek aandag by ASWD-kampioenskappe

Die Atletiek Suid-Afrika (ASA) kwalifiserende byeenkoms, wat die afgelope naweek in Oudtshoorn plaasgevind het, het wyd kommentaar oor die bevoegdheid van ASWD om byeenkomste op hierdie skaal aan te bied ontlok.

- Liezl van Niekerk

Atlete spring weg tydens een van die hardloop items.

(Foto: Johann Coetzer)

Die kritiek het veral ontstaan omdat atlete in SWD hierdie byeenkoms gebruik om te kwalifiseer vir ASA-byeenkomste om nasionaal te kan deelneem.

Een van die voorvalle wat die meeste aandag getrek het, was tydens die 400 mhekkies vir o. 18-seuns, toe die derde hekkie in een van die atlete se bane ontbreek het. Dit het daartoe gelei dat die atleet die wedloop van voor af moes aanpak.

'n Video van die voorval het kort daarna wyd op sosiale media versprei.

Na aanleiding van die voorval is verskeie klagtes deur die atletiekgemeenskap geopper. Dit sluit onder meer in dat daar nie elektroniese tydsberekening vir baanitems vertoon is nie, dat medaljes nie aan deelnemers oorhandig is nie, foute op programme, dat sommige uitslae verkeerd deurgegee is, en vrae oor die bevoegdheid van tegniese beamptes.

Volgens 'n ouer wat bekend is met atletiekadministrasie en wat die insident gesien het, was die hoofoorsaak van die insident die feit dat daar nie 'n tegniese beampte teenwoordig was nie.

Die opstel van die hekkies is vir kinders gelos terwyl die tegniese beampte dit nie gekontroleer het nie.

Die beampte het eers opgedaag na die insident plaasgevind het.