Tradisie en trots hou Georgies aan die gang

Terwyl die spelers reeds sweet op die oefenveld ter voorbereiding vir die nuwe seisoen, bou George-rugbyklub doelgerig aan iets groter as net wedstryde en punte - 'n volhoubare toekoms gegrond op mense, waardes en die gemeenskap.

- Hugo Redelinghuys

George-rugbyklub se afrigterskorps vir die nuwe seisoen is, van links: Jacob Louw (derdespanhoofafrigter), Jason Phooko (tegniese afrigter derde span), Jaco Gouws (direkteur van afrigting), Jonathan Botha (eerste spanhoofafrigter), Perez Julyan (tweedespanhoofafrigter) en Gregory Gerber (tegniese afrigter eerste span).

Volgens Jacques van Reenen, president van George-rugbyklub, is die klub se grootste krag nie net wat op die veld gebeur nie, maar die unieke kultuur wat oor dekades heen gevestig is.

"By Georgies is daar 'n spesiale atmosfeer van liefde en samesyn. Ons is meer as 'n rugbyklub - ons is 'n familie," sê hy.

Die klub se leuse, "Beauty for Ashes," weerspieël hierdie ingesteldheid.

"In die wêreld ontvang mense daagliks as, en baie gee as vir as terug. By Georgies probeer ons iets anders doen - ons gee skoonheid terug vir as," verduidelik Van Reenen.