தனித்துவ அடையாள அட்டை பெறாத 7.54 லட்சம் விவசாயிகள்!

இருபது மாதங்களுக்கும் மேலாக கால அவகாசம் வழங்கியும்கூட தமிழகத்தில் சுமார் 7.54 லட்சம் விவசாயிகள் தனித்துவ அடையாள அட்டை பெறுவதற்கு முன்வரவில்லை.

- நமது நிருபர்

தமிழகத்தில் மொத்தம் 1.23 கோடி ஏக்கர் விவசாய நிலங்கள் உள்ளன. மாநிலம் முழுவதும் சுமார் 42.52 லட்சம் விவசாயிகள் உள்ளனர். இவர்களுக்கான மானியத் திட்டங்கள், கடனுதவி, நிதியுதவி உள்ளிட்ட அனைத்துத் திட்டங்களும் மத்திய, மாநில அரசுகளின் மூலம் செயல்படுத்தப்பட்டு வருகின்றன.

விவசாயிகளுக்கான மானிய விலை உரத் திட்டத்துக்கு மட்டுமே அரசு பல கோடி ரூபாய் செலவிடுகிறது. ஆனால், மானிய விலையில் விற்கப்படும் உரங்கள், விவசாயத்துக்கு மட்டுமன்றி, பிற தொழிற்சாலைகளின் தேவைக்கும் அதிகளவில் பயன்படுத்தப்படுவதாக குற்றச்சாட்டு எழுந்தது. இதை நெறிமுறைப்படுத்த மத்திய அரசு மண் வளத் திட்டத்தை கடந்த 10 ஆண்டுகளுக்கு முன்பு தொடங்கியது. ஆனாலும், இந்தத் திட்டம் மூலம் எதிர்பார்த்த அளவுக்கு உரத்தின் தேவை குறையவில்லை.

இதனிடையே, கடந்த 2019-ஆம் ஆண்டுமுதல் விவசாயிகளுக்கு பிரதமரின் கௌரவ நிதி உதவித் தொகை வழங்கும் திட்டம் செயல்படுத்தப்பட்டு வருகிறது. இதில் தகுதியில்லாத நபர்கள் பயனாளிகளாக இடம் பெற்றதாகக் கண்டறியப்பட்டது.