பழங்குடியினர், சீக்கியர்களுக்கு அவமரியாதை

காங்கிரஸ் மீது பிரதமர் மோடி குற்றச்சாட்டு

- 

குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீதான விவாதத்தின்போது அமளியில் ஈடுபட்டதன் மூலம் பழங்குடியினர், பெண்கள் மற்றும் அரசமைப்புச் சட்டத்தை அவமதித்துள்ளது காங்கிரஸ்' என்று பிரதமர் நரேந்திர மோடி வியாழக்கிழமை குற்றஞ்சாட்டினார்.

மத்திய அமைச்சர் ஒருவரை (ரவ்நீத் சிங் பிட்டு) துரோகி என அழைத்ததன் மூலம் சீக்கியர்களையும் காங்கிரஸ் அவமதித்துள்ளது; என்மீது எவ்வளவு வெறுப்பு உணர்வை பரப்பினாலும், காங்கிரஸால் ஒருபோதும் எனக்கு குழிதோண்ட முடியாது' என்றும் பிரதமர் குறிப்பிட்டார்.

குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீதான விவாதத்துக்குப் பதிலளித்து மாநிலங்களவையில் பிரதமர் மோடி வியாழக்கிழமை உரையாற்றினார்.

அவர் பேசத் தொடங்கியவுடன் காங்கிரஸ் உள்ளிட்ட எதிர்க்கட்சிகள் கடும் அமளியில் ஈடுபட்டன. மாநிலங்களவை எதிர்க்கட்சித் தலைவர் மல்லிகார்ஜூன கார்கேயை பேச அனுமதிக்க வேண்டும் என மாநிலங்களவைத் தலைவர் சி.பி.ராதாகிருஷ்ணனை நோக்கி எதிர்க்கட்சியினர் முழக்கங்களை எழுப்பத் தொடங்கினர்.

அப்போது மல்லிகார்ஜூன கார்கேயை நோக்கி, அமர்ந்தே முழக்கம் எழுப்புமாறு பிரதமர் கூறினார். பின்னர், பிரதமர் மோடி உரையாற்றத் தொடங்கிய சிறிது நேரத்தில் காங்கிரஸ் உள்ளிட்ட எதிர்க்கட்சிகள் வெளிநடப்பு செய்தன.