அடுத்த தேர்தலிலும் அதிமுகவுக்கு எதிர்க்கட்சி வரிசைதான்

எதிர்வரும் சட்டப்பேரவைத் தேர்தலிலும் அதிமுகவுக்கு எதிர்க்கட்சி வரிசைதான் கிடைக்கும் என்று முதல்வர் மு.க.ஸ்டாலின் பேசினார்.

- 

சென்னை, ஆக. 9:

சென்னையை அடுத்த தாம்பரத்தில் மாவட்ட அரசு தலைமை மருத்துவமனைக் கட்டடத்தைத் திறந்து வைத்து, 20,000 பேருக்கு வீட்டுமனைப் பட்டாக்களையும் முதல்வர் மு.க.ஸ்டாலின் சனிக்கிழமை வழங்கினார்.

இந்த விழாவில் அவர் பேசியதாவது:

ஏற்றத்தாழ்வற்ற, சமத்துவ சமுதாயத்தைக் கட்டமைக்க சொந்த வீடு இல்லாத நிலமற்ற ஏழைக் குடும்பங்களையும் பெண்களையும் முன்னிறுத்தி இலவச வீட்டுமனைப் பட்டா வழங்குவதை திராவிட மாடல் அரசு கொள்கையாக வைத்திருக்கிறது. அதன்படி, கலைஞர் கனவு இல்லம், அனைவருக்கும் வீடு வழங்கும் திட்டம் போன்ற திட்டங்கள் ஏழை மக்களுக்கு பேருதவியாக இருக்கிறது.

அரசு செய்த பல்வேறு சீர்திருத்தங்கள் மற்றும் முன்னெடுப்புகளால், திமுக அரசு பொறுப்பேற்றதில் இருந்து கடந்த ஆண்டு வரையிலும் 10,26,734 பேருக்கு வீட்டுமனைப்பட்டாக்கள் வழங்கப்பட்டுள்ளன. இன்னும் கூடுதலாக வீட்டுமனைப் பட்டா கிடைக்க வேண்டும் என்ற நோக்கத்தில் தமிழக அரசு நடவடிக்கைகள் எடுத்தது.