பிகார் விவகாரம்: எதிர்க்கட்சிகள் தொடர் அமளி

மூன்றாவது வாரமாக முடங்கிய மக்களவை

- 

புது தில்லி, ஆக. 4: பிகார் வாக்காளர் பட்டியல் சிறப்பு தீவிர திருத்தம் குறித்து விவாதம் நடத்த அனுமதிக்கக் கோரி எதிர்க்கட்சிகள் தொடர் அமளியில் ஈடுபட்டதால், மக்களவை மூன்றாவது வாரமாக திங்கள்கிழமையும் முடங்கியது.

கோஷங்களை எழுப்பியபடி, பதாகைகளை கையில் ஏந்தியபடியும் எதிர்க்கட்சி உறுப்பினர்கள் தொடர் அமளி செய்ததால், மக்களவை நாள் முழுவதும் ஒத்திவைக்கப்பட்டது.

அதே நேரம், தற்போதைய மாநிலங்களவை உறுப்பினரும் ஜார்க்கண்ட் முன்னாள் முதல்வரும் மாநிலத்தில் ஆளும் ஜார்க்கண்ட் முக்தி மோர்ச்சா கட்சி நிறுவனருமான சிபு சோரன் மறைவையொட்டி, அவருக்கு இரங்கல் தெரிவிக்கப்பட்ட பின்னர் மாநிலங்களவையும் அலுவல்கள் எதுவும் நடைபெறாமல் நாள் முழுவதும் ஒத்திவைக்கப்பட்டது.

நாடாளுமன்ற மழைக்கால கூட்டத் தொடர் கடந்த ஜூலை 21-ஆம் தேதி தொடங்கியது முதல், இந்த விவகாரத்தை எதிர்க்கட்சிகள் தொடர்ந்து எழுப்பி வருகின்றனர். ஆனால், 'தேர்தல் ஆணையம் போன்ற அரசமைப்புச் சட்ட அமைப்புகளின் செயல்பாடுகள் குறித்து நாடாளுமன்றத்தில் விவாதிக்கமுடியாது' என்று மத்திய அரசு மறுத்து வருகிறது. இதன் காரணமாக, நாடாளுமன்ற இரு அவைகளும் தொடர்ந்து முடங்கி வருகின்றன.