கூட்டணியில் எனது முடிவே இறுதியானது

எடப்பாடி கே. பழனிசாமி திட்டவட்டம்

- 

சிதம்பரம், ஜூலை 16: கூட்டணியில் எனது முடிவே இறுதியானது என்று அதிமுக பொதுச் செயலர் எடப்பாடி கே. பழனிசாமி திட்டவட்டமாகத் தெரிவித்தார்.

கடலூர் மாவட்டம், சிதம்பரம் சட்டப்பேரவைத் தொகுதியில் 'மக்களைக் காப்போம் தமிழகத்தை மீட்போம்' என்ற தலைப்பில் எடப்பாடி பழனிசாமி சுற்றுப்பயணம் மேற்கொண்டுள்ளார். இதை முன்னிட்டு, சிதம்பரத்துக்கு செவ்வாய்க்கிழமை இரவு வந்த அவர், புதன்கிழமை காலை தனியார் விடுதியில் விவசாயிகளுடன் கலந்துரையாடல் நிகழ்ச்சியில் பங்கேற்றார்.

மாலையில் சிதம்பரம் மேலரத வீதியில் நடைபெற்ற 'ரோடு ஷோ' நிகழ்ச்சியில் வேனில் இருந்தபடியே மக்களிடையே உரையாற்றினார். அவர் பேசியது:

பாஜகவுடன் கூட்டணி வைத்தால், அதிமுகவை விழுங்கிவிடும் என முதல்வர் ஸ்டாலின் கூறுகிறார். நீங்கள் பாஜகவுடன் கூட்டணி வைத்தபோது விழுங்கி விட்டார்களா? வாஜ்பாய் பிரதமராக இருந்தபோது கூட்டணி வைத்து ஆட்சி அதிகாரத்தில் பங்கேற்றீர்கள். இருமுறை பாஜகவுடன் கூட்டணி வைத்திருந்த திமுகவுக்கு எங்களைப் பற்றி பேசத் தகுதி கிடையாது.

பாஜகவுடன் கூட்டணி வைத்ததால் ஸ்டாலினுக்கு பயம் வந்து விட்டது. திமுக கூட்டணி வைத்தால் அது நல்ல கட்சி, அதிமுக கூட்டணி வைத்தால் அது மதவாத கட்சி. இது எந்த விதத்தில் சரி?