ரஷியா: மேலும் ஒரு முக்கிய ராணுவத் தளபதி படுகொலை

ரஷிய ராணுவத்தின் மேலும் ஒரு முக்கியத் தளபதி வெள்ளிக்கிழமை படுகொலை செய்யப்பட்டார்.

- 

மாஸ்கோ, ஏப். 25:

தலைநகர் மாஸ்கோ அருகே காரில் மறைத்துவைக்கப்பட்டிருந்த வெடிகுண்டு மூலம் நடத்தப்பட்டுள்ள இந்தப் படுகொலை, ரஷிய அதிகாரிகள் மற்றும் போர் ஆதரவாளர்களைக் குறிவைத்து உக்ரைன் இதற்கு முன்னர் நடத்தியுள்ள படுகொலைகளைப் போன்று அமைந்துள்ளதாகக் கூறப்படுகிறது.

இது குறித்து ரஷிய புலனாய்வுக்குழு செய்தித் தொடர்பாளர் ஸ்வெட்லானா பீட்டர்ன்கோ கூறியதாவது:

பாதுகாப்புத் துறையின் நடவடிக்கைப் பிரிவு இயக்குநரகத்தில் துணை இயக்குநராகப் பொறுப்பு வகித்து வந்த யாரொஸ்லவ் மாஸ்கலீக் கார் குண்டு வெடிப்பு மூலம் வெள்ளிக்கிழமை படுகொலை செய்யப்பட்டார்.

அவர் வசித்துவந்த பலாஷிகா புறநகர்ப் பகுதியில் நிறுத்தப்பட்டிருந்த காரை அவர் கடந்து சென்றபோது, அதில் மறைத்துவைக்கப்பட்டிருந்த வெடிகுண்டு தொலைவில் இருந்து வெடிக்கச் செய்யப்பட்டது. இதில் அவர் உயிரிழந்தார்.

சம்பவப் பகுதியில் இருந்து வெடிகுண்டுகளின் சிதறல்கள் சேகரிக்கப்பட்டு, ஆய்வுக்காக அனுப்பப்பட்டுள்ளன என்றார் அவர்.