4 பிணைக் கைதிகளின் சடலங்களை ஒப்படைத்தது ஹமாஸ்

இஸ்ரேலில் இருந்து பிணைக் கைதிகளாக பிடித்துச் செல்லப்பட்ட தாய், இரு குழந்தைகள் அடங்கிய நான்கு பேரின் சடலங்களை ஹமாஸ் அமைப்பினர் வியாழக்கிழமை ஒப்படைத்தனர்.

- 

கான் யூனிஸ், பிப். 20:

கடந்த மாதம் 19-ஆம் தேதி முதல் அமலில் இருக்கும் காஸா போர் நிறுத்த ஒப்பந்தத்தின் கீழ் பிணைக் கைதிகளின் சடலங்களை ஹமாஸ் படையினர் ஒப்படைத்தது இதுவே முதல்முறை என்பதால் இந்த நிகழ்வு இஸ்ரேலில் பெரும் சோகத்தை ஏற்படுத்தியுள்ளது.

காஸாவில் இருந்து இஸ்ரேலுக்குள் கடந்த 2023 அக்டோபர் 7-ஆம் தேதி நுழைந்த ஹமாஸ் படையினர் அங்கு சுமார் 1,200 பேரை படுகொலை செய்தனர். மேலும், அங்கிருந்து 251 பேரை பிணைக் கைதிகளாக ஹமாஸ் படையினர் கடத்திச் சென்றனர்.

அவ்வாறு கடத்திச் செல்லப்பட்டவர்களில், யார்டன் பிபாஸ் (35), அவரின் மனைவி ஷிரி பிபாஸ் (33), அவர்களது இரு ஆண் குழந்தைகள் (இப்போது உயிருடன் இருந்திருந்தால் 5 மற்றும் 2 வயது) ஆகியோரும் அடங்கும்.

ஹமாஸின் இந்த திடீர் தாக்குதலுக்குப் பதிலடியாக காஸாவில் இஸ்ரேல் ராணுவம் கடும் தாக்குதல் நடவடிக்கையை மேற்கொண்டது. இதில் இதுவரை 48,297 பாலஸ்தீனர்கள் - அவர்களில் மிகப் பெரும்பாலானவர்கள் பொதுமக்கள் - உயிரிழந்துள்ளனர்.