விருதுநகர் அருகே பட்டாசு ஆலையில் வெடி விபத்து: மூவர் உயிரிழப்பு

விருதுநகர் மாவட்டம், காரியாபட்டி அருகே தனியார் பட்டாசு ஆலையில் புதன்கிழமை நேரிட்ட வெடி விபத்தில் தொழிலாளர்கள் மூவர் உயிரிழந்தனர். மூவர் பலத்த காயமடைந்தனர்.

- 

விருதுநகர், ஜூன் 11:

மதுரையைச் சேர்ந்த ராஜசந்திரசேகர் என்பவருக்குச் சொந்தமான பட்டாசு ஆலை, விருதுநகர் மாவட்டம், காரியாபட்டியை அடுத்த வடகரை கிராமத்தில் உள்ளது. இந்தப் பட்டாசு ஆலையில் 30-க்கும் மேற்பட்ட அறைகள் உள்ளன. இங்கு, காரியாபட்டி, தண்டியனேந்தல், அச்சங்குளம், கரிசல்குளம் உள்ளிட்ட பகுதிகளைச் சேர்ந்த 150-க்கும் அதிகமான தொழிலாளர்கள் பணியாற்றுகின்றனர்.

இந்தப் பட்டாசு ஆலையில் புதன்கிழமை காலை தொழிலாளர்கள் வழக்கம்போல பணியில் ஈடுபட்டிருந்தனர். ஆலையில் உள்ள ஒரு அறையில் கல்குறிச்சியைச் சேர்ந்த சௌண்டம்மாள் (54), தண்டியனேந்தலைச் சேர்ந்த கணேசன் (55), கருப்பையா, முருகன், பேச்சியம்மாள், அச்சங்குளத்தைச் சேர்ந்த மாரியம்மாள் ஆகியோர் வெடி மருந்து தயாரிக்கும் பணியில் ஈடுபட்டனர்.