ஒடிஸா: வன்முறையைத் தொடர்ந்து கட்டாக்கில் பதற்றம் இணைய சேவை முடக்கம்

கட்டாக்/புவனேசுவரம், அக்.5: ஒடிஸா மாநிலம் கட்டாக்கில் ஏற்பட்ட வன்முறையைத் தொடர்ந்து, ஞாயிற்றுக்கிழமையும் பதற்றமான சூழல் நீடித்தது. இதையடுத்து, அந்த நகரத்தில் இணைய சேவை முடக்கப் பட்டது.

- 

மக்கள் வன்முறையைக் கைவிட்டு அமைதி காக்கும்படி மாநில முதல்வர் மோகன் சரண் மாஜீ, பிஜு ஜனதா தளம் கட்சித் தலைவர் நவீன் பட்நாயக் ஆகியோர் கோரிக்கை விடுத்துள்ளனர்.

தெபிகரா பகுதியில் உள்ள நதி படித்துறையில் துர்கை சிலையை விசர்ஜனம் செய்ய விஸ்வ ஹிந்து பரிஷத் (விஎச்பி) அமைப்பினர் கடந்த வெள்ளிக்கிழமை நள்ளிரவில் ஊர்வலமாகச் சென்றனர். தர்கா பஜார் வழியாகச் சென்றபோது, ஊர்வலத்தில் அதிக சப்தத்தில் பாடல் ஒலித்ததாகக் கூறப்படுகிறது. இதற்கு அப்பகுதி மக்கள் எதிர்ப்பு தெரிவித்தனர்.